مدي تأثير الكلمة

                         مدي تأثير الكلمة

كتيير مننا ممكن كلمة تغير حياته من الاسوء الي الاحسن او العكس .. هي كلمة .. ممكن تحس بنفسك وقيمتك بكلمة .. ممكن تكره نفسك بكلمة .. ممكن تفشل بسبب كلمة .. ممكن مستقبلك كله يتغير وتفكيرك كله يتغير بسبب كلمة .. يعني تعددت المواقف والسبب كلمة !! ..

 اهم حاجة ان احنا منسلمش نفسنا لكلمة ومنحبطش نفسنا بسبب كلمة من واحد معندوش حاجة غير انه يحبط في الناس اللي يقولك مش هتقدر تجيب المجموع ده واللي يقولك مش هتقدر تخش الكلية اللي انت عاوزها واللي يقولك مش هتعرف تحقق حلمك .. لو كل واحد فينا سلم نفسه للكلمة اللي هتوديه للاحباط والفشل محدش فينا هيكون ليه مستقبل ومش هيعرف يحقق حلمه .. اصل المحبطين اشكال منهم اللي حاقد عليك بيحسدك دايما ونفسه انك تقع ومتنجحش ومنهم اللي ميهموش حاجة غير انه يحبط في الناس مع انه مش هيستفاد حاجة من كده بس نقول ايه بقي ..

( واعلم جيدا ان لم يكن لك حاقدا .. فاعلم انك انسان فاشل ) كما قال الشيخ الشعراوي رحمه الله .. بمعني الحاقد وهو الحاسد الذي يتمني لك السؤ ويأتي تحت هذه الكلمة الانسان المحبط ايضا .. فاعلم جيدا ان لم يكن لك محبطا اعلم انك في اتجاه خطأ اعلم انك في طريق الفشل  ..

لازم كل واحد فينا ميسلمش نفسه للكلمة الوحشة الكلمة اللي هتخليه يحبط .. الكلمة اللي هتفقده ثقته في نفسه ثقته في نجاحه .. منسلمش نفسنا للاشخاص المحبطين .. اللي هما كترو دلوقتي للاسف !!..

المتفائلين اللي هما قليلين دلوقتي .. هما دول اللي الواحد مفروض يبقي زيهم يسمع كلامهم .. يعمل بكلامهم .. هما دول اللي بيدونا دفعة للعمل .. بيدونا ثقة في نفسنا .. ثقة ان احنا نقدر ننجح .. بيدونا امل وتفاؤل في كل اللي جاية .. بيدونا ثقة في ربنا .. يارب اجعلنا من الناس المتفائلين .. الواثقين من رحمتك يارب .. يارب اجعلنا مما يعطون الامل والتفاؤل للاخرين يارب .. يارب اجعلنا من الواثقين في قدرتك و عفوك يارب .. اللهم امين

ربك كريم ربك حليم خلي ظنك في سندك جميل ..

قالولك عمرك ماهتنجح

وفي ثانية الفشل اصبح مِلكك

قالولك صعب انك تعمل افكارك اللي بتقولها وتحقق

حسيت باليأس والاحباط انهم اصبحو ملكك

قالولك سهل انك تنجح

تقدر ع  احلامك اللي بتقولها وتحقق

حسيت بالامل اصبح مِلكك

شوفت بكلمة ممكن تعلي وبكلمة تصبح في الارض

اوعي في يوم تُحبط من كل كلمة بتتقالك في الوش

اصل المُحبطين اشكال

اللي يقولك عمرك ماهتنجح اصله علطول منك غيران

والي يقولك يلا يافاشل اصله ده ملك اليأس والاحباط

شوفت مدي تأثير الكلمة لما تقولها في وش حد

خلي كلامك كله تفاؤل واوعي في يوم تحبط حد

J       J J J J J J J J J J J

فضل صيام 13, 14, 15 من كل شهر

             فضل صيام 13, 14, 15 من كل شهر

فضل صيام الايام البيض وهي 13, 14, 15 .. كما قال صلي الله عليه وسلم ( صِيَامُ ثَلاثَةِ أَيَّامٍ مِنْ كُلِّ شَهْرٍ صِيَامُ الدَّهْرِ وَأَيَّامُ الْبِيضِ صَبِيحَةَ ثَلاثَ عَشْرَةَ وَأَرْبَعَ عَشْرَةَ وَخَمْسَ عَشْرَةَ )
.. من صام الثلاث ايام وكانما صام الدهر كله أي كأنما صام العمر كله يعني لو صمتهم كل شهر وربنا يقدرك ان شاء الله .. ليك ثواب كبير ..

صيام الثلاث الايام البيض من شهر شعبان .. شهر شعبان كما قال اسامة بن زيد (" قلت يا رسول الله، لم أرك تصوم من الشهور ما تصوم من شعبان قال: ذاك شهر يغفل الناس عنه، بين رجب ورمضان، وهو شهر ترفع الإعمال فيه إلى رب العالمين, فأحِبُّ أن يرفع عملي وأنا صائم" ) صدق رسول الله صل الله عليه وسلم .. فهو شهر ترفع فيه الاعمال الي الله وياسلام لو صمنا هترفع اعمالنا واحنا صايمين والثواب الكبير للصيام وبالذات في الايام البيض .. ثوابك كبير اوي عند ربنا ان شاء الله ..

لو مقدرتش تصوم قول لصحابك يصومو .. واخواتك وقرايبك تاخد الثواب برده .. ومتخليش حد زعلان منك او انت تزعل من حد .. كما قال صلي الله عليه وسلم (  "إن الله تعالى ليطلع في ليلة النصف من شعبان فيغفر لجميع خلقه إلا لمشرك، أو مشاحن" ) ..

مشاحن: أي مخاصم لمسلم أو مهاجر له .. يعني انت لو زعلان من حد صلحه ومتخليش حد زعلان منك عشان ربنا يتقبل  صيامك .. ده احنا زي مابنقول بنتشعلق في رضا ربنا وبنقول يارب اغفر لنا ذنوبنا .. واساسا الدنيا دي مش مستاهلة انك تزعل من حد او تخاصم حد .. وان شاء الله ربنا

 يتقبل صيامك ان شاء الله ..

متقولش مش قادر اصوم ياعم ده انت في اجازة يعني مبتنزلش كتير من البيت الصبح وبتصحي متأخر فلو صمت مش هتحس بالصيام وهتاخد الثواب كمان .. وبعدين ياعم اعتبره تجربة وتعود لرمضان شهر الخير والنفحات .. وخلي كلامك كلو جميل ومليان ذكر واستغفار وانت صايم .. عشان تاخد الثواب الكبير .. ومتنساش القران اقرا قران كتير واوعي تهجره وتنساه .. واتعود علي صلاة السنة من دلوقتي عشان لما يجي رمضان متتعبش وتحس بصعوبة وانت بتصلي وقول لصحابك علي الصيام وانصحهم وقلل الشتايم مابينكم .. عشان تاخد ثوابهم معاك .. ولما تكون قاعد معاهم والاذان بيأذن فكرهم بالصلاة وقولهم يلا نصلي عشان ربنا يكرمكو وتاخدو الثواب كلكو .. ومتنساش الدعاء وانت صايم ادعي كتير .. ادعي ليك ولبلدك ولاهلك ولاصحابك .. وان شاء الله ربنا يتقبل الدعاء .. ويتقبل الصيام .. وربنا يكرمنا ويقدرنا علي الصيام كلنا عشان ترفع اعمالنا واحنا صايمين .. وربنا يغفرلنا ذنوبنا ويرحمنا ان شاء الله ويرزقنا الجنة بغير حساب باذن الله ..

شهر شعبان ترفع فيه الاعمال الي الله وانا احب ان يرفع عملي وانا صائم

قول الرسول الكريم .. عليه افضل الصلاة والتسليم

هنصوم التلات ايام البيض .. هنصومهم احنا وكل المسلمين

وهنقول لصحابنا وكل المقربين .. وهناخد ثوابهم كلهم اجمعين

هنبطل الشتايم والالفاظ الوحشة دي ..

وهنكتر الذكر والاستغفار لرب العالمين ..

وربنا يكرمنا بالثواب الكبير .. يرزقنا الجنة مع الرسول الكريم 

ان الله كره اليكم القيل والقال

                  ان الله كره اليكم القيل والقال

هتكلم في حاجة يمكن هي سبب كل اللي احنا فيه دلوقتي سواء عن اللي بيحصل في مصر او اللي بيحصل مع كل واحد فينا وهو موضوع ( القيل والقال ) بالمعني العامي يعني الكلام عن الناس زي قالي وقولتله وشوفت ده عمل ايه .. وشوفت ده بيقول ايه .. كل واحد فينا مبقاش في حاله لازم يعرف كل حاجة عن الناس وعن كل واحد يعرفه .. مبيسبش حد في حاله بالمعني العامي .. مع ان ده شئ مكروه .. كما قال الرسول صلي الله عليه وسلم ( ان الله كره اليكم القيل والقال وكثرة السؤال ) ..) وكره لكم قيل وقال ) والمراد به النهي عن حكاية أقوال الناس ، والبحث عنها ليخبر غيره ، فيقول : قال فلان كذا وقيل لفلان كذا ..  واحنا طبعا منتوصاش علطول بنتكلم عن الناس بنموت في حاجة اسمها غيبة ونميمة .. ربنا يهدينا كلنا ونبطل العادة السيئة دي ..

وع رأي شيخ كنت بسمعه .. لو واحد صاحبك قالك شوفت العالم فلان الفلاني عمل ايه ولا سمعت صوت الشيخ الفلاني وهو بيقرا قران هتقعد مش مركز معاه ومنفض ومش اخد بالك .. لكن لو قالك شوفت الواد صاحبنا عمل ايه مع البنت دي .. تقعد مركز وتنتبه اوي وتكون عاوز تعرف كل التفاصيل وكل اللي بيحصل مابينهم .. لو كل واحد فينا اصبح في حاله هنتغير كتير والله ..

نفسي نعمل بقوله صلي الله عليه وسلم ( من حسن اسلام المرء تركه مالا يعنيه ) .. يعني من حسن اسلام واخلاق الشخص ده والانسان ده تركه مالا يعنيه .. يعني ميدخلش نفسه في اللي مالوش فيه .. يسيب كل واحد في حاله .. مش لازم يعرف كل حاجة مالوش دعوة بيها .. لو عملنا بقوله صلي الله عليه وسلم .. وصدقنا النية والقلب .. والله هنتغير كتير وكل واحد فينا ربنا هيكرمه وهيكون شخص محبوب بين الناس ..

ده سبب اللي بيحصل في البلد دلوقتي .. طب ازاي !!! .. اقولك انا دلوقتي كل واحد فينا مش سايب حد في حاله وبيموت في سيرة الناس .. ويحب يتكلم عن ده شوية .. وشوف الشخص ده عمل ايه .. شوف بنت الشخص الفلاني عملت ايه .. علطول بنجيب سيرة الناس .. في منا اللي بيحب يشوه سمعة الناس .. معرفش بيستفاد ايه .. بس ربنا يهديه .. هو حسابه عند ربه .. يطلع خبر شوف ده عمل ايه .. وشوف ده سوا ايه .. تلاقي اللي فينا غير فكرته عن الشخص ده وغير رأيه فيه يروح قايم عليه ويطلعه غلطان وشخص تيييت يعني .. والتاني نفس الكلام والكلام اساسا غلط .. نشوه في سمعة الناس بسبب كلمة ده قال وده قال .. ربنا يهدينا كلنا ويوفق مصر لما يحبه ويرضاه .. ويوفقها للاصلح ليها ولاهلها ان شاء الله ..

نرجع تاني .. للاشخاص اللي بيحبة يجيبو في سيرة الناس ويتكلمو عنهم ويشوه سمعتهم كمان .. ومبيبطلوش كلام في سيرة الناس .. هما مش عارفين زي ماهما بيتكلمو عن الناس في ناس برده بتتكلم عنهم .. وربنا شايفهم وبيحاسبهم .. في ناس سعات بتكون مريضة بكده فعلا مريضة بسيرة الناس ومتقدرش تبطل تتكلم عنهم .. دول بقي بيبقي صعب عليهم يبطلو يتكلمو في سيرة الناس مهما حصلهم حلهم الوحيد انهم يتعلجو من المرض ده .. المرض ده اصعب من أي مرض في الجسم .. ربنا يعفينا من مرض الكلام في سيرة الناس ..

وخلي بالك ( كما تدين تدان ) .. يعني زي ما بتتكلم عن الناس غيرك بيتكلم عنك .. وزي مابتجيب في سيرة البنات وتسؤ سمعتها .. الكلام هيعود عليك في اخواتك في مراتك او في بناتك فيما بعد .. فخي بالك لانك كما تدين تدان ..

يااه بقي لما نعمل كمان بقوله صلي الله عليه وسلم ( لايؤمن احدكم حتي يحب لاخيه مايحب لنفسه ) .. بمعني ان الواحد مننا مش هيكون كامل الايمان الا عندما يحب اخوه ويحب ليه مايحب لنفسه .. طب انت تعرف ان العلماء قالوا ان حديث ( لايؤمن احدكم حتي يحب لاخيه مايحب لنفسه ) , وحديث ( من حسن اسلام المرء تركه مالا يعنيه ) العلماء قالو ان الحديثين دول يعادلا ثلث الدين أي ان الحديث يكمل به العبد دينه .. يعني انت لو مشيت بيهم في حياتك هتكون انسان محترم وطيب .. وكل الناس بتحبك .. ومستحيل تلاقي حد بيكرهك .. وبلدنا ان شاء الله هتتقدم بينا .. وربنا هيوفقنا لما هو فيه خير لينا ولاهلنا ان شاء الله .. بجد مصر هتتقدم لما كل واحد فينا يخليه في حاله وملوش دعوة بغيره بيعمل ايه .. ويبدأ بنفسه عشان اللي حواليه اكيد هيتعلمو منه وهيبدأو زيه .. ان شاء الله هنتقدم وهنصبح دولة محترمة وشعبها محترم لما نحترم نفسنا ونحترم الناس ونحترم سيرتهم .. ربنا هيكرمنا ان شاء الله ..

حكمة ربنا في كل حاجة بتحصلنا

                  حكمة ربنا في كل حاجة بتحصلنا

كل واحد فينا لما بيحصل معاه موقف او ربنا بيختبره بموقف بيقعد يقول اشمعني انا كل حاجة تحصلي ما في ناس مبيحصلهاش حاجة هو كل حاجة بتحصل معايا انا ليه يارب .. سيبك من انه بيعترض ع كلام ربنا وانه بيقول كلام مثل ( اشمعني , وليه انا يارب ) كلام مكروه قوله وممكن يكفر بسببه .. لكن برده الواحد فينا مبيبصش لحكمة ربنا في الموقف اللي حصلنا ده .. ربنا اكيد موجهلك رسالة من اللي بيحصلك .. شوف انت كنت بتعمل ايه غلط بسبب الموقف ده مش لما يحصل معاك اي موقف تقعد زعلان كده وتقعد تندم ع حظك .. اساسا ربنا عارف الخير ليك فين فانت بتعترض علي ايه .. ربك كريم ربك حليم خلي ظنك في سندك جميل ..

بص للموقف اللي حصلك بشكل ايجابي .. شوف الدرس اللي ربنا موجهُ ليك .. اتعلم من الموقف اللي حصلك عشان متقعش فيه تاني .. ولازم تكون عارف ان ربنا ليه حكمة في كل شئ بيحصلنا .. وعارف الخير لكل واحد فينا فين .. متقعدش تتضايق وتندم وتزعل نفسك ..

خليك متفائل دايما وبص للي بيحصلك بتفائل وبنظرة ايجابية هتعرف ان اللي حصلك ده مش حاجة وحشة زي ما انت كنت فاهم او عارف وهتفهم الدرس اللي ربنا عايزك تفهمه وتتعلمه من الموقف اللي حصلك ده .. هتعرف ان كل حاجة بتحصلك فيها خير ليك .. عشان ربك عارف الخير ليك فين كما قال تعالي في كتابه العزيز ( والله خير الرازقين ) ..

في حاجة عاوز اقولها لكل طلاب تالتة ثانوي او الطلاب اللي داخلين تالتة ثانوي ربنا يوفقهم ويكرمهم في امتحاناتهم ياارب .. لما تظهر النتيجة متتصدمش وتعيط وتتضايق وتزعل نفسك لان ربك هو اللي كاتبلك المجموع ده وكاتبلك الكلية اللي انت هتخشها دي .. حتي لو الكلية دي مش كنت بتحلم بيها .. بس خليك فاكر ان ربنا ليه حكمة في الكلية اللي انت هتخشها دي وربنا عارف الخير ليك فين .. يمكن لو دخلت الكلية اللي انت كنت بتحلم بيها مش هتعرف تنجح فيها  او مش هتلاقي نفسك فيها .. او يمكن متشتغلش بشهادتك اللي اخدتها من كليتك دي ويبقي انت ضيعت وقتك فيها وخلاص بتتدرس حاجة مش هتفيد بيها غيرك .. يمكن الكلية اللي انت كنت مستئل بيها لما تخشها تتفوق فيها وتلقي نفسك فيها وانت مكنتش متوقع كده .. بص لحكمة ربنا في مجموعك ده وفي تنسيقك اللي هتجيبه وكليتك اللي هتخشها .. وخليك عارف ان ربنا عارف الخير ليك فين ..

نرجع تاني للمواقف اللي بتحصلنا واحنا بنندم حظنا فيها ومبنشوفش حكمة ربنا فيها ..

انا حصل معايا موقف لن انساه .. ده كان درس ليا من ربنا واختبار ليا .. لو كنت ندمت حظي واقعدت اقول اشمعني انا .. كنت خسرت كتيراووي اكتر من اللي انا خسرته من الموقف ده .. لكن انا اتعلمت من اللي حصلي ده كتيير وعرفت ان ربنا ليه حكمة في اللي حصلي وعرفت الدرس اللي ربنا موجهُ ليا ولولا الموقف ده كان في حاجات كتير متغيرتش في حياتي .. بس انا الحمدلله بصيت للموقف بتفائل ونظرة ايجابية شوية واتعلمت من كتير واتغيرت كتير بعده .. بعني دي تعتبر حاجة فاصلة في حياة الانسان .. والحمدلله الواحد ربنا كرمه بعد الموقف ده لاني اتغيرت فعلا واتعلمت من الدرس اللي ربنا سبحانه وتعالي كان موجهُ ليا ..

فلازم كل واحد فينا لما يحصل معاه موقف او اي حاجة يعرف حكمة ربنا في اللي حصله ده ويبص للي حصله بتفائل وميتشائمش ابدا .. ويتعلم من الدرس اللي حصله ده .. ولازم كل واحد فينا يعرف ان ربنا عارف الخير لينا فين .. تفائل بكل حاجة بتحصلك يمكن اللي حصلك ده يبقي نقطة تغير في حياتك كلها من الاسوء للاحسن ان شاء الله .. واحمد ربك ع كل حاجة بتحصلك وخلي ظنك في سندك جميل  ..

ربك كريم ربك حليم خلي ظنك في سندك جميل ..

الاحلام . . . لا تعرف الكذب !!!

                الاحلام  . . . لا تعرف الكذب !!!

كل واحد فينا من هو صغير وهو بيحلم االلي يقول انا عاوز اطلع دكتور زي بابا او مهندس او ظابط .. كلام كنا بنقوله واحنا صغيرين عشان الحاجات دي هي اللي احنا  شايفنها ادامنا وسامعين اهلنا بيقولو عنها انها احسن كليات واحسن وظائف في الدنيا .. اهلنا رسخو فينا من واحنا صغيرين اي تركو فينا من واحنا صغيرين فكرة ان الكليات دي هي الي ناجحة وان اللي بيخشها ده شخص محترم وناجح .. اما الكليات اللي  غيرها كليات فشلة واللي بيخشها ده بيكون فاشل..

 طبعا الكلام ده بنبتدي نفكر فيه لغاية مندخل ثانوي ونعرف ان الكلام ده غلط وكل واحد فينا يفكر في حلمه وموهبته اللي يقدر يفيد بيها نفسه وغيره بجد .. ويبتدي يفكر هيحقق حلمه ده ازاي وايه هي الخطوات اللي المفروض يمشي عليها هو ده التفكير اللي لازم نفكره عشان نعرف نحقق حلمنا ولازم نؤمن بالمقولة دي ( الاحلام .. لا تعرف الكذب ولا تعرف المستحيل ) الاحلام اللي بنحلمها او احلامنا اللي عاوزين نحققها وهو ده هدفنا في الحياة احلامنا دي لا تعرف الكذب يعني مش كذابة يعني الاحلام دي حقيقية الاحلام دي واثقة فينا ان احنا هنحققها وبرده لا تعرف المستحيل اي حلم بتحلمه او حلمك اللي اانت عاوز تحققه مفيش فيه كلمة مستحيل .. مفيش في قاموس كلمة الاحلام مستحيل مهما كانت صعوبتها ومهما كان الحلم كبير وانت بتقول عليه صعب .. هيتحقق باذن الله .. وانت لازم تعرف ان انت اول ماتبتدي في تحقيق حلمك وتبتدي في اول خطواته انه مش هيتحقق بسهولة اكيد في صعوبات واكيد هتفشل مرة بس لازم تكون عارف ان ( اول خطوة للنجاح هي الفشل ) مش تيأس من اول غلطة و اول مرة تفشل فيها ولو فشلت تاني مش تقع وتسيب حلمك لآ اتعلم من اخطائك اللي عملتها .. لان اخطائك دي هي الدروس اللي انت بتتعلم منها عشان تعرف تحقق حلمك وتنجح فيه .. وانت اكيد عارف ان توماس اديسون بعد 999 محاولة كانت دايما محاولات فاشلة في المحاولة رقم 1000 عمل المصباح الكهربي .. وخليك عارف انه ( من اخطائك يولد نجاحك )

خليك دايما متفائل .. وخلي عندك ثقة وامل في الله (ربك كريم ربك رحيم خلي ظنك في سندك جميل )  .. وخليك واثق انك هتحقق حلمك باذن الله .. واوعي في يوم تتشائم او تيأس .. وفي مقولة بحب اقولها دايما خليك مؤمن بيها ( من التفاؤل يولد الامل ومن الامل يولد العمل ومن العمل يولد النجاح ) .. المتفائل بيجد من الصعوبات فرص يجب استغلالها .. المتفائل يجد من الفشل والمحاولات الفاشلة دروس مستفادة يتعلم منها لينجح في المرة التالية .. وخليك واثق انك هتحقق حلمك .. واوعي في يوم تبطل تحلم دي الاحلام مهياش بفلوس اصلها

وباذن الله هتحقق حلمك ..

من صغري بحلم .. وعلي الحلم ناوي احققه

هاكبر واحقق كل احلامي اللي حلمتها

ولا عمري هيأس من اي عقبة قبلتها

ولو فشلت مرة مش هتفرق اصلها

ده الفشل اول خطوة للنجاح بعدها

ولو فشلت تاني مش هقع  من بعدها

اصل انا كده بتعلم من اخطائي اللي عملتها

ولما هانجح مش هنسي كل غلطة عملتها

دي كل غلطة كانت درس ليا وقتها

هاحلم وهاحلم دي الاحلام مهياش بفلوس اصلها

بحلم بابتسامة  متفرقشِ وشوش الناس كلها

ابتسامة حلوة تكون علامة ع الوشوش كلها

J J J J J J J J J J J J J J J J J