وحدتنا خلاصنا

                      وحدتنا خلاصنا

كل مايجري في بلدنا من احداث لا اراها الا انها فتنة .. ايه فتنة ؟؟!! .. اه فتنة فسمت الشعب المصري وفرقته عن بعض .. واحنا اللي سمحنا للفتنة دي انها تكبر مابينا بسبب خلافتنا وتفكيرنا واخلاقنا وتعاملاتنا اللي اتغيرت .. احنا وصلنا لدرجة ان في ناس منا فقد انسانيتها بس كرهها لفصيل معين .. فقدنا اسلوب التعامل مع بعض .. بقي المؤيد ميتعملش مع معارض لا ويغلط فيه والعكس صحيح المعارض بقي مبيتعملش مع مؤيد وبيغلط فيه .. بقي في تخوين مابنا وكذب وحاجات كتير وحشة .. لما قامت ثورة يناير غيرتها ورجعتنا متحدين .. بس شايف الفتنة انتشرت مابينا .. والدم سال في الشوارع تاني وضحايا ملهمش ذنب ماتو والدم المصري بقي رخيص تاني ..

 ممكن افكر المعارضين والمؤيدين وافكر كل واحد مصري  اي حد نشر الفتنة وساعد في تقسيمنا افكره بحاجة حصلت في عهد الرسول صلي الله عليه وسلم ..

جاء في صحيح البخاري:
أن رجلين من المهاجرين والأنصار تشاجرا فَقَالَ الأَنْصَارِى ُّيَا لَلأَنْصَارِ. وَقَالَ الْمُهَاجِرِى ُّيَا لَلْمُهَاجِرِينَ. فَسَمِعَ ذَاكَ رَسُولُ اللَّه صلى الله عليه وسلم فَقَالَ:
مَابَالُ دَعْوَى جَاهِلِيَّةٍ 
قَالُوا يَا رَسُولَ اللَّهِ كَسَعَ رَجُلٌ مِنَ الْمُهَاجِرِينَ رَجُلاً مِنَ الأَنْصَارِ. 
فَقَالَ
دَعُوهَا فَإِنَّهَا مُنْتِنَةٌ.

ياااه ياربي .. شوفتو الرسول صلي الله عليه وسلم قال ايه .. دعو الفتنة فانها منتنة حاجة عفنة .. واحنا عمالين نتخانق ونقسم بعضنا احنا وانتو وكلام اول مره نسمعو الفتنة دي هي سبب فشلنا ورجوعنا لورا سبب فرقتنا وعدم وحدتنا ..

قال الله سبحانه وتعالي في كتابه العزيز ( أليس منكم رجل رشيد ) صدق الله العظيم .. اليس في بلدنا رجل رشيد رجل عاقل حكيم يقدر يوقف الفتنة اللي بينا ويرجع وحدتنا .. مفيش حد راجل حكيم زي العظماء زمان يقدر يوقف الفتنة مابينا .. لو مفيش يبقي حل الفتنة دي في ايد كل واحد فينا ..

الفتنة دي مش هتهدي الا لما كل واحد فينا يبدأ بنفسه ويحاول يغير نفسه ويغير تفكيره ويحسن من نفسه .. .. لما يبدأ من نفسه و يهدي الفتنة بين اهله اصحابه قرايبه يحاول يرجع يوحد المصريين .. لما يحسن من نفسه هيقدر يبني بلده ويفيدها وتكون من احسن البلاد ..

انا متفائل ومش محبط ومش هيأس وهقدر يابلدي بيكي اعديكي من المحنة ومن الشدة .. واقوم بيكي وابنيكي واعليكي ..

يارب رجع وحدتنا زي الاول .. يارب رجع الشعب المصري زي الاول ياارب .. يارب لا تفرقنا .. يارب اجعلنا متحدين كي نقف ونبني بلدنا ونعلي باوطاننا .. يارب وحدنا .. ياارب

وفي يوم وفي ليلة اتفرقنا واتقسمنا واصبحنا من افشل الفاشلين

بقينا بنقول ده مات منا ومات منكم ونسينا ان الكل في الاصل مصريين

خونا بعض وكدبنا وشوفت تاني الدم سايل في الشوارع والميادين

شوفت ذل وشوفت كدب وشوفت الكره في عيون الشمتاتين

شوفت ناس مسلوبة منها الانسانية وناس تانية نسيو حق اخواتهم الميتين

شوفت الفشل وعرفت ان الفرقة سبب فشلنا وفشل كل المحبطين

 وفي يوم وليلة اتفرقنا واتقسمنا ونسينا وحدتنا

وحدتنا اللي كانت قوتنا في ثورتنا اللي ابهرنا بها الملايين

وحدتنا اللي كانت سبب انتصارنا علي الصهاينة الملاعين

وحدتنا اللي كانت في يوم سبب تقدم وطنا وامتنا امة المسلمين

انا برده مش محبط ومتفائل يابلدي بيكي وبولادك الطيبين

اصلك يابلدي مذكورة في القران وربي حميكي من كل الظالمين

يمكن ربي بيعاقبنا لانا نسينا وحدتنا وبعدنا عن دينا و ومشينا ورا شهوات الدنيا الزايفة

 اللي متعتها زايلة وحسابها في الاخرة كبير

يارب ترجع وحدتنا وقوتنا زي ماكنا متحدين ياارب

                      وحدتنـا خلاصنـا

رمضان شهر الرحمة والمغفرة

                 رمضان شهر الرحمة والمغفرة

كل سنة وانتم طيبين .. لقد حل علينا شهر الرحمة والمغفرة والخيرات والحسنات والثواب والمحبة لقد حل علينا شهر رمضان .. رمضان كريم عليكو جميعا ..

يمكن السنادي اغلبنا مش حاسس برمضان بسبب الاحداث اللي بتحصل في البلد .. لكن تفائلو بالخير تجدوه شهر رمضان شهر الخيرات هيعود علينا وعلي مصر كلها بلخير ان شاء الله .. وان شاء الله ربنا يخلصنا من الفتنة اللي احنا عايشين فيها دلوقتي ..رمضان شهر المحبة كلنا هنقف مع بعض في صلاة التراويح .. برغم اختلافتنا اللي احنا فيها دي هنقف صف واحد جنب بعض .. ان شاء الله الخير هيعود علينا ..

رمضان شهر الرحمة .. كما قال رسول الله صلَ الله عليه وسلم ( مَنْ صَامَ رَمَضَانَ إِيمَانًا وَاحْتِسَابًا غُفِرَ لَهُ مَا تَقَدَّمَ مِنْ ذَنْبِهِ ) صدق رسول الله صلَ الله عليه وسلم .. انت لما تصوم رمضان وتعمل الخير به وتأمر الناس بالمعروف وتنهاهم عن المنكر .. ربنا بيجازيك بثواب كبير هيغفر لك ماتقدم من ذنبك ..

شهر رمضان به افضل الايام ليلة القدر .. كما قال سبحانه وتعالي في كتابه العزيز ( ليلة القدر خير من الف شهر * تنزل الملائكة والروح فيها باذن ربهم من كل امر * سلام هي حتي مطلع الفجر ) صدق الله العظيم .. كما قال صلَ الله عليه وسلم ( مَن قام ليلة القدر إيمانًا واحتسابًا، غُفر له ما تقدَّم من ذنبه  ) صدق رسول الله صلَ الله عليه وسلم .. رمضان الشهر الذي أنزل فيه القران .. كما قال الله سبحانه وتعالي ( شَهْرُ رَمَضَانَ الَّذِيَ أُنزِلَ فِيهِ الْقُرْآنُ هُدًى لِّلنَّاسِ وَبَيِّنَاتٍ مِّنَ الْهُدَى وَالْفُرْقَانِ فَمَن شَهِدَ مِنكُمُ الشَّهْرَ فَلْيَصُمْهُ ) صدق الله العظيم .. فرمضان افضل الشهور عند الله .. شهر الخير والحسنات والثواب الكبير ..

رمضان شهر الخير .. نستغله ازاي بقي .. نستغله صح .. هو شهر واحد في السنة كلها منضيعوش مننا عشان الحاجات التافهة اللي بتيجي في التلفزيون .. كلها مسلسلات تافهة حتي مش مسلسلات هادفة اقولك هتستفاد لما تابعها .. وانت ياسيدي لوعايز تتابعها تابعها بعد رمضان عندك 11 شهر اتفرج فيهم ياسيدي علي المسلسلات مضيعش منك رمضان .. متخليش المسلسلات والبرامج تسرق منك رمضان .. لاتكون متسلسلاً وراء التلفزيون .. استغل رمضان احسن استغلال .. اقولك ازاي بقي ركز معايا ..

-       حاول تختم القران اكتر من مرة .. حاول تختم القران في الاسبوع مرة لو قدرت تختمه مرتين في الاسبوع كمان يااه ثوابك كبيير ..

-       اعمل خير كتير .. انزل اشتغل في اي فريق عمل خيري وجهز معاهم شنط رمضان انزل معاهم وانزلو وقت اذان المغرب في الشارع وفطرو الناس وتاخد ثواب افطار صائم ..

-       استفيد من التلفزيون واتفرج علي برامج عمرو خالد , مصطفي حسني , معز مسعود , وبرنامج خواطر لـ احمد الشقيري .. واستفاد منهم استمع لهم جيدا واسمع نصائحهم واعمل بها ..

-       كلم صحابك ووعيهم وانصحهم وقولهم يعملو ايه في رمضان وازاي يستفادو منه مش يضيعو زي كل سنة يستفادو بشهر الرحمة .. في الدعاء والصلاة وعمل الخير ..

-       لو انت ماشي بعد الفطار ولقيت حبة شباب وقفة بتشرب سجاير وبتعاكس بنات انصحهم وفهمهم انهم في شهر رمضان وانصحهم ازاي يستفيدو بشهر الرحمة في عمل الخير مش في معاكسة البنات اللي هما زي اخواتهم والسجاير اللي ملهاش لازمة غير انها بتدمر صحتهم .. انصحهم ازاي يستفادو من شهر الرحمة في عمل الخير ..

-       خلي كلامك كله ذكر واستغفار .. وانت قاعد وانت ماشي وانت في كل مكان ..رطب لسانك بذكر الله دائما ..

لو عملت بكل الكلام ده يبقي انت كده استغليت رمضان صح وبقيت مسلم صح ..

رمضان شهر البركة والنفحات ..

 شهر الرحمة والحسنات ..

هل علينا شهر الخير ..

 شهر القران والتراويح ..

 شهر المغفرة وثوابنا كبير ..

 هل علينا شهر الخير ..

                    رمضـان كـريـم