ليست كلماتي

                              ليست كلماتي

شوية كلمات جوايا ولخبطة شوية افكار قلت اطلعهم ع طريقة بيوت موزونة ممكن تقول شعر حلمنتيشي بقي او حاجه شبه  .. انا مش بتجه للسياسة في كتاباتي ولا احب ان اتحدث بها ولن اتحدث بها بعد ذلك ولكن هي اول واخر مرة باذن الله بس هو شوية كلام جوايا بسبب اللي بيحصل في بلدي وكان لازم يطلع .. ارجو انكو تستحملو كلامي شوية .. ويارب كلنا نستفاد ونعمل بيه .. J J

ليست هذه كلماتي التي انطقها بلساني .. ليست هذه افعالي التي افعلها مع اصدقائي

ليست هذه طريقتي في معاملة اقاربي واحبابي .. ليست هذه حياتي التي كنت اعيشها ..

ماذا حل بي .. ماذا حل بنا جميعا

أكلمة سياسة هي التي غيرتنا .. أكلمة سياسة هي التي فرقتنا

بل هي كلمة سياسة من المسايسة بمعني اني اسايسك .. بالبلدي اخدك ع قد عقلك

أنحن هكذا نتسايس مع بعضنا ..

( ياسيدي صلِ ع النبي احنا شعب جميل )

اعلم بهذ اعلم بأننا احسن شعب ع الارض ليس غرورا بشعب بلدي بل هو تأكد من طيبة قلبهم وكرمهم وشهامتهم ..

ماذا نفعل الان مع بعضنا .. نتجادل مع بعضنا البعض ونقطع علاقتنا ببعض بسبب كلمة السياسة

( يااخي سياسة ايه احنا شعب عسل شوية كده وهنهدي  ليه مكبر الموضوع )

ليس تكبيرا لامرٍ بل هو خوفا من عدم قدرتنا علي التعايش مع بعضنا البعض .. فالسياسة والاحداث زائلة وذاهبة بمرورالوقت وسنبقي نحن في النهاية وسنبقي لنكمل حياتنا وتعايشنا مع بعضنا ..

( يااخي انت بتقول كلام كبير متكلم بالكلام الشعبي السهل ده .. بس عامة اللي فهمته انك خايف اننا منعرفش نعيش ونتعامل مع بعض من تاني ونرجع زي زمان بس بقولك متخفش هو احنا كده شوية وهنهدي وهنرجع واحد زي زمان )

سأتحدث معك بالفصحي ثم اتبعها بالعامة

 وسأمزجها وهعمل mix

 ممكن يطلع زي قطامش حلمنتيشي وشغل جميل

 وممكن يطلع شغل زبالة  وزي الزفت J

اصبحنا الان في عُزلة وصحابا يتفرقون .. وبسببِ بوستٍ ع الفيس ِ اصحابٌ يتشاجرون

اشاهد بوستٌ كالاتي المضحوك عليه ومغيب ومحب للجيش وسيسي .. فانا مش عايز اعرفه تاني ولا يجي يقولي ياصديقي

واشاهد منشورا اخر يحكي كالاتي .. يقولون انها مليونية والعدد اصلا مش موجود دول ناس اصلا مية مية تقول ضاربين بُرشام وتمول

واشاهد شعبا مقسوما بالفرقة اصبح مشهورا .. والفتنة ظاهرة في الصورة والشعب نجحها بسهولة

واشاهد وطنا يتمزق والقلبُ عليه  يتفطر .. وولاده عاملين من بنها ومحدش كده واخد باله

 وأري ايضا قلة قليلة ساكتة في الفتنة لم تظهر .. انا اشكرها واحييها وبقول ياريت الكل يفكر

يااهلي واصحابي اقاربي واحبابي و من يَعرِفني .. انا لا ولم أيئس من وطني او حتي اخواتي واقاربي

متفائل لابعد درجة تتصورها ..  واري بلدي غدا كالزهرة  الكل يتمنا ان يصبح في مكانها  .. أراها غدا مشرقة ومنارة للعلمِ واهلا ومُصدِرةَ للاخلاقِ

بس الحل ياخويا وصحابي ان الوحدة ترجع تاني .. بس هقولك كلمة واعيدها عمر الظلمة ماترجع تاني

ركز بس في بكرة وابني رجع من تاني مجد بلادك .. عاوز تفيدها خدها نصيحة فيدها بعملك مش بهتافك ..

فيدها بشغلك وباحلامك فيدها بفكرة تنور بكرة فيدها بدراستك ويا كتابك فيدها باخلاق دينا السِمحة فيدها بقلمك وبالوانك فيدها بتفائلك واملك في بكرة فيدها بتحقيق حلم ولادك ..

يارب نرجع نتعايش ونترك السياسة قليلا او نبعد عنها كلنا فترة ونرجع تاني زي زمان .. نبطل نتفرج ع برامج التوك شو اللي ملهاش لازمة غير انها بتحرق دمنا من كدب وتكبير الامور نرجع نقرا من تاني اللي بيكتب يرجع يكتب عادي ويبطل يكتب في سياسة حتي انا كتبت دلوقتي بس يعني هي شوية حاجات جوايا قلت اطلعها في الموضوع ده بس مش اكتر ..

نبعد عن السياسة فترة كبيرة كده ونرجع لحياتنا زي زمان ونشوف هيحصل ايه لكل واحد مننا .. عاوزين نرجع تاني واحد نرجع مع بعضنا وبلاش نفسم نفسنا ونقول ليبرالي , اخواني , سلفي , علماني كلنا واحد كلنا مصريين ..

نرجع نتفائل من تاني ومنيأسش من وطنا ولا نياس من رحمة ربنا .. ربنا سبحانه وتعالي قال في كاتبه العزيز ( ولا تأيسو من روح الله انه لا يياس من روح الله الا القوم الكافرين ) صدق الله العظيم ..

 نتفائل ونثق في ربنا سبحانه وتعالي ونبدأ نشتغل ونعمل في بلدنا عشان تقوم م المحنة اللي هي فيها وصدقني زي ماانا قلت ( عاوز تفيدها فيدها بعملك مش بهتافك ) احنا دلوقتي عاوزين ثورة عمل مع ثورة خلاق مع ثورة تعايش مع بعض اخلط كل دول مع بعض واعملهم وابدأ بنفسك بيهم هتلاقي محصلة النجاح ان بلدنا قامت م المحنة اللي هي فيها ووقفت ع رجليها واتقدمت باذن الله .. وصدقني ( دولة الظلم ساعة ودولة الحق الي قيام الساعة ) كل واحد حقه هيجي بس لما نرجع لدينا صح ونبقي مسلمين صح مش تدين بالكلام او تدين ظاهري قدام الناس وبيني وبين نفسي مكبر بمثل اني راجل متدين .. ولو احنا رجعنا لدينا صح والحق مجاش في الدنيا .. فالحق جاي جاي في الاخرة فالحق مش هيضيع ( رب الحُقوقِ لا يضيعها ) ..

 احنا بس نبتدي نعمل في البلد ونشتغل .. واحنا كطلاب نركز في مزاكرتنا عشان نقدر نجيب مجموع ندخل بيه كلية نفيد بعلمنا بلدنا لما نكبر .. باذن الله ..

وهقولها تاني كل واحد مش هيقدر يغير صاحبه او اهله او اي حد يعرفه الا لما يبدأ من نفسه ويغيرها للاحسن ويغير اخلاقه للاحسن لما يتغير ربنا هيساعده انه يغير غيره وبعد كده نقدر نغير وطنا واهلنا للاحسن باذن الله ..

نتفائل بكل اللي جاي ..

 نثق في ربنا ..

نشتغل ونعمل بجد عشان مصلحة بلدنا ..

نركز في مزاكرتنا ودراستنا ..

 نخلي الامل موجود دايما مابينا ..

 بس كده تفائلو يـــا بشـــر J J

ذكريات الطفولة :)

                 ذكريات الطفولة  J

ذكريات الطفولة الجميلة .. كل واحد فينا بيجي عليه وقت كل شوية كده ويفتكر ذكريات الطفولة ويسرح مع الايام الجميلة .. طب فاكر انت كلامي لجيل التسعينات .. سابق ولاحق والمحقق كونان وبكار ع الفطار في رمضان وعالم سمسم وتيمون وبومبا وسيمبا والمدرسة واحنا في ابتدائي وحياتنا واحنا صغيرين وكنا بنفتكر

الحياة دي سهلة اوي وكنا بنكبر شوية شوية ونعرف ان الحياة بتصعب شوية بس كنا اخدينها ضحك وهزار ومش فارقة معانا حاجة خالص .. طب فاكر انت لما كان بيبقي عندنا رحلة في المدرسة واحنا في ابتدائي بنبقي مستنين اليوم ده علي نار ولما بيجي بنبقي هنطير من الفرحة .. طب فاكر لما كنت بتلعب انت وصاحبك x  o  في الحصة وكنت بتبقي فرحان جدا .. طب فاكر مجلة ميكي لما كنت بتجيبها كل اسبوع وبطوط وعم دهب وكنا بنبقي فرحانين اوي واحنا بنقراها .. طب فاكر لما كنت بتاكل في الحصة من غير مالاستاذ ياخد باله وكنت عامل نفسك واد خطير بقي J .. وفاكر وفاكر وفاكر ذكريات كتيرة اوي يدوبك بس لما بتفتكرها بتبتسم .. J J

بتقول يااه لو ترجع تاني الايام دي بس هي لو رجعت مش هتبقي ذكريات الوقت الي احنا فيه دي وكل وقت بنعيشه لما بيعدي بيبقي ذكريات انت بنفسك تقدر تتحكم فيها ممكن تبقي ذكريات حلوة وذكريات سعيدة او ذكريات مؤلمة ومحزنة ممكن تبقي ذكريات نجاحك في حاجة عملتها ونجاحك ده بيستمر ..

عارف في مزيج غريب كده بين الطفولة والكِبَر .. مزيج هو اللي بيخلينا نعيش لحظات مجنونة وبتبقي احلي لحظات حياتنا .. بيخلينا نعمل مواقف مجنونة وغريبة ممكن كنا منتخيلش اننا نعملها .. بيدينا امل في اللي جاي وبيدينا ثقة في نفسنا وبيدينا دفعة لبكرة كده تعرف المزيج ده هو اللي مخلينا عايشين اجمل وقت ..

 اه احنا كبرنا وعرفنا ان الحياة مش زي ماكنا متخيلين واحنا اطفال انها سهلة اوي .. لا الدنيا دي دار اختبار ربنا بيختبرنا فيها عشان يجازينا بالثواب الكبير وهو الجنة بس مش معني كده انها صعبة اوي لآ انت الي بأيدك برده تسهلها ع نفسك او تصعبها بعلاقتك مع ربنا وعلاقتك مع الناس وحياتك الشخصية واحلامك اللي عاوز تحققها وتفاؤلك في كل اللي هيجي وتفاؤلك بكل حاجة بتحصل بس اكيد لازم كل واحد فينا هيمر بأيام صعبة بس اهم حاجة ان احنا منيأسش ونحبط ونكره الدنيا لا ده يبقي دافع ليك عشان تتفائل باللي هيجي وتشتغل لبكرة ..

 اه احنا كنا فاكرين ان خلاص بقي هنستريح والبلد هتبقي حلوة بعد الثورة ودلوقتي في منا اللي بييأس وفي منا اللي خلاص وصل لدرجة انه هيكره بلده ..

احنا اه اكيد كانت البلد هتبقي حلوة بعد الثورة بس بايدينا احنا لو كل واحد فينا بدأ بنفسه وغيرها واصلح من حاله وبدء يشتغل عشان بلده و بقينا مع بعض كويسين وعلاقتنا كويسة مع بعض وكل واحد فينا فكر في مصلحة البلد الاول قبل المصلحة الشخصية كانت البلد هتبقي حلوة وهتتقدم بس احنا عملنا الثورة وقعدنا ومعملناش حاجة تاني فمنزعلش دلوقتي عشان احنا اللي سلمناها بعد ماقومنا بيه سلمناها لناس مش عايزة مصلحة البلد وكانت بتفكر في مصلحتها الشخصية ووصلت البلد للحالة اللي هي فيها دي ..

 بس احنا لسه فيها اهو عشان نستردها من تاني مش ننزل تاني وهتافات لآ الاحسن كل واحد فينا يبدأ بنفسه ويغير من نفسه .. ويحاول يصلح من حاله ويحسن علاقته مع كل الناس .. وميخسرش صاحبه عشان مختلف عنه في الرأي ولازم كلنا نعرف ان في اختلافنا رحمة دي حكمة ربنا في كونه ان مينفعش كلنا متفقين ع رأي واحد .. وكل واحد فينا يبدأ يفكر في البلد ويشتغل عشان يعلي بيها .. ده ربنا قال في كتابه العزيز ( ان الله لا يغيرو مابقوم حتي يغيرو ما بأنفسهم ) صدق الله العظيم ..

 احنا مش هنقدر نغير بلدنا ونغير شعبنا ونغير عيلتنا الا لما كل واحد فينا يبدأ بنفسه .. وسدئني لو غيرت نفسك هتقدر تغير صحابك وربنا هيقدرك وتقدر تغير عيلتك وبعد كده باقي المجتمع .. بس لما تكون نيتك صافية لمصلحة البلد وربنا هيكون معاك .. واوعي في يوم تيأس لان اليأس خيانة .. خيانة لنفسك اللي تستاهل انك تتفائل وتكون احسن من كده .. خيانة لعيلتك ابوك وامك اللي عاوزين يشوفوك احسن واحد في الدنيا .. خيانة لبلدك اللي حط امالها عليك عشان تقدر تغيرها وتقوم بيها .. تفائل دايما باللي جاي لان ربك معاك في كل شئ .. استنجد بيه دايما هو اللي عارف حالك وادعي دايما ربك انه يكرم بلدنا .. وان شاء الله بلدنا هتقوم م المحنة اللي هي فيها وان شاء الله هشوفها من الدول المتقدمة وهتوصل لكده بايدينا كلنا وعملنا واجتهادنا في بلدنا عشان نعلي بيها لان بلدنا تستاهل تكون مكانتها احسن من كده ..

ربك كريم ربك حليم خلي ظنك في سندك جميل .. 

العيد يعني الفرحة

               العيد يعني الفرحة

كل سنة وانتو طيبين يلا العيد اهو ع الابواب .. شوفو كنت لسه بقولكو من شوية سنة وانتوطيبين بمناسبة شهر رمضان اهو عدي بسرعة ومحسيناش بيه  ربنا يباركلنا في ماتبقي منه ويجزينا خير عن اللي عملناه في الشهر المبارك من الاعمال الصالحة والدعاء والصلاة والصيام ..

خلاص العيد ع الابواب اهو .. يعني الفرحة يعني يوم الوقفة فاكر زمان وانت صغير كنت بتعمل ايه تاخد الدوش من بعد الفطار وتلبس اللبس الجديد وتنزل تلعب بيه وانت فرحان وتقعد تفرقع صواريخ ولما بتسمع اغنية ام كلثوم ياليلة العيد بتحس بفرحة العيد وبتبقي قاعد طول اليوم فرحان .. واول يوم العيد وكل العيلة متجمعة ومستني العيدية من قرايبك وتلم الفلوس وتروح تعدها ع جنب وتنزل تشتري البندقية او تشتري اي لعبة والبنات يشترو العروسة بتاعت كل عيد فاكر ايام زمان وانت صغير هي بحد ايام متتعوضش J J .. بس برده فرحة  العيد لسه بنحس بيها واحنا كبار لما بتنزل يوم الوقفة وتقعد مع صحابك لغاية الفجر وتقعدو تهزرو وتتضحكو العيد بيجي علينا بالفرحة .. ربنا بيجازينا بالعيد بعد صوم 30 يوم وصلاة التراويح بيجازينا بالعيد وفرحة العيد ثواب لتعبنا في شهر الصوم ربنا كريم اوي ورحيم اوي .. فرحة العيد اللي مبتتعوضش وبالذات بتحس بفرحة العيد في مصر واهل المصر الطيبين اينعم هما دلوقتني متقسمين بسبب اللي بيحصل في البلد بس كلهم هيتجمهو تاني باذن الله هيتجمعو علي فرحة العيد .. ربنا يسعد قلوبنا كلنا J J ..

زي ماربنا مابيجزيك بالعيد وفرحة العيد ثواب ليك بعد رمضان وصيام 30 يوم .. انت متغضبش ربنا في العيد اول تيجي في العيد بقي وزي مابتقول تقلبها وتقول مااحنا خلاص رمضان خلص يعني رمضان خلص تقلب الدنيا بعد رمضان وتعمل معاصي تاني .. لا زي ماانت قدرت تصبر 30 يوم عن المعاصي عشان متغضبش ربنا كمل جميلك بقي بعد رمضان كمان وكمل ع كده وافضل علطول باخلاق رمضان لان رب رمضان هو رب كل الشهور هو رب السنة كلها .. يلا ربنا يهدينا كلنا ويبعدنا عن المعاصي ويفرحنا بالعيد ياارب J J ..

في العيد بقي زي ماانت بتبقي فرحان ممكن تفرح ناس تانيين تفرح قرايبك تفرح صحابك تفرح الاطفال اللي عند في المنطقة ..

-       ممكن تعمل وق مرسوم عليه سمايل ومعاه بونبوني وتوزعه علي الاطفال بعد الصلاة ومعاه كمان بلالين بجد هندخل الفرحة علي قلبهم ..

-       ممكن تجيب 50 جنيه من معاك وتروح اي بنك وتفكها 50 قرش وتوزعها للاطفال بعد الصلاة ع اد ماهتكون الفلوس قليلة بس 50 قرش فلوس جديدة هتسعد الاطفال اوي هي ممكن تكون الفكرة غالية عليك بس شوف انت بقي تعمل دي توزع عليهم بونبوني بس سدئني هتفرح قلبهم بالحاجات البسيطة دي ..

- ممكن تجيب 100 جنيه وتفكها 1 جنيه فلوس جديدة من اي بنك بس الفكرة دي مدمرة حبتين J وتدي الجنيه لاي طفل غلبان تلاقيه ع اد مالفلوس اللي انت هتديهالو بسيطة بس هتدخل الفرحة ع قلبه وهتسعده اوي لان في حد افتكره وعيد عليه اي طفل يتيم اي طفل فقير اي طفل من اطفال الشوارع ..

-       مع اصحابك وقرايبك بقي ممكن تبعت لكل واحد فيهم رسالة فيها صورة ليك انت وهو ومعاه ورقة مرسومة عليها سمايل ومكتوب عليها من ورا عيد سعيد كل سنة وانت طيب ويارب تفضل علطول بخير بجد الحاجة البسيطة دي هتفرح صحابك وقرايبك وهتسعدهم اوي ..

وربنا يجعلنا دايما سبب في فرحة الناس لان دي بجد بتقي فرحة ليك قبل ماتبقي فرحة ليهم .. انت لما بتشوف حد فرحان ومبسوط وبتكون انت السبب في فرحته بجد بتبقي فرحان اوي سعيد ..

يلا كل سنة وانتو طيبين وعيد سعيد عليكو كلكو وعيد سعيد ع المصريين كلهم والعرب كلهم وع كل المسلمين ان شاء الله ويارب دايما في فرحة وسعادة ..

واهو العيـد  قرب اهو ياولاد .. والفرحة هتيجي وتدق الباب

والفرحـة هترجع زي زمان .. هنقول العيد فرحة واجمل فرحة ونفتكر زكريات زمان .. وهنرجع واحد زي زمان

والكل هيبقي كده فرحان .. ده العيد فرحة واجمل وقت بنستناه .. واهو العيد قرب اهو ياولاد .. والفرحة هتيجي وتدق الباب ..

J J J J J J J J J J J