الجمعة، 27 سبتمبر 2013

( رضا ربنا ) سر السعادة 3

             ( رضا ربنا )  سر السعادة 3

لما ربنا بيكون راضي عليك .. بتحس بفرحة في حياتك بتلاقي نفسك علطول فرحان ومبتسم .. بتلاقي الكل حواليك بتحس فعلا بطعم الحياة الجميلة .. ماهو رضا  ربنا هو سر السعادة الحقيقية ..

صلاتك سر سعادتك ..
لما بتحافظ علي صلاتك وبتقضيها في وقتها ربنا بيكون راضي عنك .. بتعمل الفروض اللي عليك وبتلاقي رد ربنا عليك بفرحة وضحكة جميلة مع اصحابك مع اهلك مع جيرانك المهم انك بتحس بفرحة وسعادة طعمها فعلا غريب ..

حافظ ع صلاتك دايما .. اولا عشان الصلاة فرض عليك وواجب عليك انك تقضيه وانت مش بتقضيه غصبٍ عنك لآ انت بتصلي عشان بتحب ربنا مش عشان بتخاف منه بس لا ده حبا وطمعا في رضاه عنك .. ثانيا عشان الصلاة بتلاقي فيها راحتك وبتشكي فيها همك وضيقك وزعلك لخالق الكون .. وبعد ماتصلي بتحس راحة ونِفسك هادية وصافية .. صلاتك سر سعادتك حافظ عليها .. J J

وقرائتك للقران وبتحس براحة كده وربنا بيرضي عنك .. حافظ علي قراءة القران ولو كل يوم صفحة .. 


اخلاقك الطيبة سر سعادتك ..                                                                                       
 اخلاقك اخلاق دينا السمحة اخلاق الاسلام الاخلاق اللي علمهالنا سيدك وسيد الخلق اجمعين محمد ( صلي الله عليه وسلم ) هي سر سعادتك .. اللي بتخلي ربنا راضي عنك .. وبيحبك ويابختك بقي لما ربنا يحبك ويرضي عنك ..                                                        
                                                 
قال رسول الله صلى الله عليه وسلم: " إن الله إذا أحب عبداً دعا له جبريل، عليه السلام، فقال: إني أحب فلانا فأحبه، قال: فيحبه جبريل، ثم ينادي في السماء فيقول: إن الله يحب فلانا فأحبوه، فيحبه أهل السماء، قال: ثم يوضع له القبول في الأرض، وإذا أبغض الله عبداً، دعا جبريل، فيقول: إني أبغض فلانا فأبغضه، فيبغضه جبريل، ثم ينادي في أهل السماء: إن الله يبغض فلاناً، فأبغضوه، قال: فيبغضونه، ثم توضع له البغضاء في الأرض "

صدق رسول الله صلي الله عليه وسلم .. كن مثال لاخلاق الاسلام .. خليك مسلم صح وانشر اخلاق الاسلام الطيبة وخليك قدوة لغيرك .. باخلاقنا سنرتقي ..

-       رضا اهلك ( ابوك وامك ) من رضا ربنا ..

 لما ابوك وامك يرضو عليك بتحس بفرحة وانت قاعد معاهم وهما فرحانين بيك وانت مشرفهم بانك مسلم صح شاب او شابة محترم .. محترمهم ومقدرهم .. وبتحبهم وعامل حسابهم ومبتتعبهمش دايما .. بتحس بسعادة كده طعمها جميل وانت سامع دعوة الحاجة وانت نازل ودعوة الحاج وهو بيصلي وفرحتهم انهم خلفو شاب – شابة محترمة .. ويابختك بقي لو ابوك وامك راضيين عنك ..
ربك ذكرهم في كتابه العزيز ( وَقَضَى رَبُّكَ أَلاَّ تَعْبُدُواْ إِلاَّ إِيَّاهُ وَبِالْوَالِدَيْنِ إِحْسَانًا إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلاَهُمَا فَلاَ تَقُل لَّهُمَآ أُفٍّ وَلاَ تَنْهَرْهُمَا وَقُل لَّهُمَا قَوْلاً كَرِيمًا . وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا رَبَّيَانِي صَغِيرًا ) صدق الله العظيم .. رضا ابوك وامك من رضا ربنا عليك .. اوعي فيوم تزعلهم خليك دايما السبب في فرحهم وانت مشرفهم دايما .. لان رضاهم عنك سر سعادتك .. ربنا هيرضي عليك لما اهلك يرضو عليك .. J J

ده رضا ربك يابن ادم سر السعادة ليك .. وصلاتك وانت راكع وساجد بين ايديه وبتدعيله ياخالق الكون من الذنوب نجيني وع الصراط ياارب واهديني .. وتقوم من صلاتك براحة وسعادة والنفس مرضية .. واخلاقك الطيبة وبصمتك للناس وكلامك الطيب ونشرك للاسلام .. ورضا ابوك وامك عليك يابني ده من رضا ربك وسر سعادتك في دنياك واخرتك .. ربك كريم مبيخزلش عبده وحليم اوي في جوده وفـ كرمه .. ياارب رضاك ورحمتك بينا .. يااارب

ربك كريم ربك حليم خي ظنك في سندك جميل .. J

حافظ ع صلاتك هي سر سعادتك ..
اخلاقك الطيبة كن مسلم صح .. وانشر اخلاق الاسلام اللي الرسول صلي الله عليه وسلم  علمهالنا ..
باخلاقنا سنرتقي ..
رضا ابوك وامك من رضا ربنا اوعي في يوم تزعلهم ..
رضا ربنا عليك سر سعادتك في دنياك واخرتك ..

بس كده تفــائلو يابشر .. J J

الجمعة، 20 سبتمبر 2013

( الهدف – الحلم ) سر السعادة 2

            ( الهدف – الحلم ) سر السعادة 2

سر سعادتك و الحاجة اللي  بتفرح بسببها هي احلامك لما تبدأ في تحقيقها وتمشي ع الخطوات اللي هتوصلك لحلمك وهدفك .. لما تحقق خطوة لحلمك بتفرح اوي .. بتحس بسعادة غريبة .. ماهي سر من اسرار سعادتك هي احلامك واهدافك في الحياة .. حدد حلمك وهدفك يلا وابدأ في تحديد الخطوات اللي هتوصلك ليه .. طبعا كل ده محتاج انك تكون متفائل لابعد الحدود وعندك ثقة في ربك وامل في بكرة ..

سر سعادتي ازاي ؟؟!! .. انت لما تحقق حلمك في سعادة وفرحة اكتر من كده انك تحقق خطوة في طريق نجاحك وطريق حلمك سعادة لا توصف .. بس اكيد في طريقي للوصول لحلمي هقع مرة يمكن مرتين .. المهم انك متيئسش من نفسك لمرة .. ومتيئسش من حلمك ومن املك في بكرة .. خلي ثقتك في ربك وتفاؤلك كبير جدا .. تفاؤل لابعد الحدود .. واحلم دايما احلامك ملهاش نهاية احلامك الي مالا نهاية امل هم سموها احلام ليها .. بس الاحلام دي بتتحقق بقوة عزيمتك وارادتك القوية وتفاؤلك وثقتك في ربك .. لما تحقق حلمك هتحس بالسعادة .. هتحس بالسعادة لما يكون حلمك هيساعد الناس .. كل شخص هتساعده بحلمك وهدفك اللي هتحققه باذن الله هتحس بالسعادة انك كنت سبب في مساعدة حد .. بجد تحقيق حلمك وهدفك هما سر من اسرار سعادتك .. J J

حدد حلمك حدد هدفك واجري عليه .. اوعي تقول صعب اني اوصل .. اصل ده حلمي صعب بعيد .. لا ياسيدي ممكن توصل لو ركزت جهدك عليه .. ايوة ياسيدي ايوة هتوصل لو تفائلت في بكرة اللي جاي فيه .. ثقتك في ربك هي املك اللي بتتشعلق فيه .. ايوة ده حلمك سر سعادتك وهتنجح فيه ..
وخلي بالك هتقع مرة .. ومرة تانية برده مش بعيد
ابتسم دايما وابدأ من جديد .. حاول وعافر هتوصل اكيد

-       رسالة لكل طلاب ثانوي :

متصعبش السنة ع نفسك دي سنة زي اي سنة بس لازم تبذل فيها كل جهدك عشان هيترتب عليه تحقيق حلمك وهدفك .. ومتشتتش نفسك بين حاجتين لا حدد هدفك من دلوقتي وهو هجيب 100% ان شاء الله .. ركز ع الهدف ده هو صعب بس مش مستحيل وهيتحقق ببذل جهد اكبر .. انت داخل السنة دي ( اكون او لا اكون ) .. وعيش السنة دي بكل مافيها هزر واضحك وافرح والعب لانها اجمل سنة في حياتك بكرة لما تعدي ع خيير باذن الله هتفتكر وتقول دي اجمل سنة عيشتها برغم كل اللي فيها من صعوبات وضغوطات .. انت لازم تتخطي كل الضغوطات دي وتتغلب عليها .. ومتقولش هخش الكلية دي لو مجبتش مجموعها هخش الكلية دي لو مجبتش يبقي الكلية دي كده انت بتشتت نفسك وف الاخر لا هطول دي ولا دي .. انت كل تركيزك دلوقتي انك تجيب 100% مهما كان حلمك او كليتك اللي عاوز تخشها مجموعها اقل .. طبعا كل بامر الله .. انت تعمل الي عليك وتبذل جهدك والباقي علي ربك .. واهم حاجة تفاؤلك وثقتك في ربك انه هيكرمك السنة دي وهيحقق حلمك ..
اهم حاجة رضي ربنا عليك ورضي ابوك وامك عليك سدئني دول من اسباب نجاحك السنة دي .. اوعي تقصر في صلاتك واقرا قران ولو صفحة في اليوم بس حافظ ع قراءة القران لان رضي ربك عليك سبب نجاحك السنة دي ..
وربنا يوفقنا كلنا السنة دي ..

اسرار السعادة كتير دور عليها هتلاقيها قريبة ليك .. اصل السعادة جواك انت طلعها وخلي دايما الفرحة فيك .. حلمك وهدفك سر سعادتك وتحقيقهم ده سر ليه .. تفاؤلك ويا ثقتك في ربك ده سر من اسرار السعادة ليك ..

نركز في بكرة .. نركز ع حلمنا وهدفنا ..
نثق في قدراتنا .. وندور ع السعادة جوانا ..
نتفائل في بكرة كل اللي جاي ونثق في ربنا ..
نركز ع هدف وهو اجيب السنة دي 100% ..
هيتحقق باذن الله .. نبذل كل جهدنا عليه ..
كل اللي بيحصلنا خير لينا ..
بس كده ..
تفـائلــو يـا بشــــر J J



الجمعة، 13 سبتمبر 2013

( الثقة بالله - التفاؤل ) سر السعادة 1

             ( الثقة بالله - التفاؤل )  سر السعادة 1

عمرك سئلت نفسك ايه هو سر السعادة .. اقولك انا سر السعادة في الثقة بالله دي اهم سبب للسعادة .. ثقة في ربك انه مش هيضيعك هو اللي حاسس بيك .. ثقة ربك واللي هيحصل بكرة .. ثقة في مستقبلك اللي في ايد ربك .. ثقة في حلمك وانت واثق في ربك انه هيحققه .. ثقة في ربك لما تقع في مشكلة وتلجأله وتدعيله وتلاقي الهموم والمشاكل راحت .. ثقة في ربك وفي بكرة اللي جاي ..
كما سٌئل الحسن البصري رحمه الله عن سر زهده في الدنيا زهده الذي هو سر سعادته قال ..

 عَلِمتُ أنْ رزقي لا يأخذه غيري فاطمئن قلبي. . 

وَ عَلِمتُ أنْ عملي لا يقوم به غيري فشُغِلْتُ به وحدي . .

وَ عَلِمتُ أنْ اللَّه مطَّلِعٌ علَيَّ فاستحيت أن يراني علَىْ معصية . .

وَ علمت أن الموت ينتظرني فأعددت الزاد للقاء ربِّي . .

انظر بماذا رد وقال انها الثقة في ربه .. الثقة في خالقه سبحانه وتعالي .. فلا تشغل نفسك بشئ ولا تشغل تفكيرك ماذا سأفعل في هذا وذاك .. ثق في ربك هو الذي سيخرجك من اي مأزق ستقع به .. او اي مشكلة هتقع فيها ..

نرجع بقي الثقة في ربك سر السعادة ازاي .. انت لما بتثق في ربك عارف انه حاسس بيك وعالم بحالك وبكرة هيجي احسن بتحس بالسعادة وبالراحة والابتسامة هتبقي في وشك دايما .. الراحة والسعادة دي هي عشان ربنا راضي عنك .. لانك مبتعصيش ربك وبتعمل كل اللي عليك بتصلي صلاتك في وقتها اخلاقك طيبة .. عشان انت فعلا مثال للرجل المسلم .. احسن سعادة وراحة في الدنيا هي الراحة والسعادة لما يكون ربك راضي عنك ..

وفي حكمة او مقولة بحبها اوي .. ( ابتسم فرزقك مقسوم وقدرك محسوم وأحوال الدنيا لا تستحق الهموم لأنها بين يدي الحي القيوم ) .. فلا تخف من الغد او من مستقبلك فكله بيد الله .. فقط ثق في ربك ستشعر بالسعادة والراحة وهو ده اهم اسباب  السعادة J  ..

التفاؤل سر السعادة ..

انت لما بتتفائل بكل حاجة بتحصلك بتحس بالسعادة وبتقي دايما مبتسم .. التفاؤل هو سر السعادة انت بتبقي متفائل لانك واثق في ربك فتفائلك ده ناتج من انك واثق في ربك .. ان كل احاجة بتحصلك خير .. وكل حاجة بتحصلك ربك ليه حكمة فيها .. فبتتفائل وبتبقي دايما سعيد وفرحان ..

تفاؤلك هو سر نجاحك ايضا .. انت لما بتتفائل بتعيش الدنيا بطعم السعادة اجمل طعم واجمل نكهة للحياة هي نكهة السعادة والفرحة .. لكن لما تيئس من نفسك وتحبط بتعيش الدنيا بطعم الحزن ع فكرة انت اللي بئيدك انك تعيش في سعادة وفرحة وتفاؤل او حزن واحباط ويئس كل حاجة بايديك ..
 ولو بتدور ع السعادة بجد السعادة جوااك دور عليها وطلعها لكل اللي حواليك وفرح كل اللي حواليك واسعدهم دايما واوعي في يوم تحبط حد .. انشر التفاؤل دايما خليك مصدر للتفاؤل .. اصحي كل يوم وانت بادئ يومك بابتسامة ومعاها كوباية تفاؤل مليانة امل .. وركز في حلمك واسعي اليه واجتهد وخطط للخطوات اللي هتوصلك لحلمك وامشي عليها ..
وفي مقولة بحبها اوي وجميلة جدا (  من التفاؤل يولد الامل ومن الامل يولد العمل ومن العمل يولد النجاح ومن النجاح تولد السعادة ) .. تفاؤلك هو سر نجاحك وعملك هو سر سعادتك اوعي في يوم تحبط او تيئس .. ده تفاؤلك هو اللي هينجح .. ركز بس في بكرة وابني .. ابذل جهدك واشتغل يبني .. واوعي تقول مش هقدر لوحدي .. ده انت لوحدك تقدر تبني .. وتجمع الكل معاك .. وترجعو مجد البلاد .. وتلحقو كل اللي فات .. ده تفاؤلك هو اللي هيقدر مع املك وعملك وثقتك في ربك تلقي نجاحك اسمك عليه ..


واوعي تقلل من نفسك مرة .. ده انت بنفسك تقدر يلا .. ارسم خطوة لحلمك يلا .. اكتب فكرة تنور بكرة .. وتفاؤلك ده طاقة ليك .. وتفاؤل ده سر سعادتك مع ثقتك في ربك اكيد ..

نثق في نفسنا وقدراتنا ..
نثق في ربنا ونتفائل بكل حاجة بتحصلنا ..
سر السعادة في الثقة في ربك وتفاؤلك ..
كل حاجة بتحصلنا ربنا ليه فيها حكمة ..
كل حاجة بتحصلنا هي خير لينا ..
نتفائل دايما هنلاقي السعادة في ايدينا ..
بس كده ..
تفائلـو يـا بشــر J J



الجمعة، 6 سبتمبر 2013

كوباية تفاؤل مليانة امل


                
                   كوباية تفاؤل مليانة امل

عاوز تحس بيومك ويومك يكون جميل محتاج كوباية تفاؤل يوميا مع تلت معالق امل وشوية سعادة من فوق مع حبة فرح وابتسامة يومك هيكمل وهو اجمل يوم وكل يوم افيد من اللي قبله ان شاء الله ..



جرعة امل وتفاؤل الصبح ..

- لو صحيت وحسيت انك متضايق افتكر علطول جرعة التفاؤل اول ماتحس بضيق اذكر ربك دايما هتحس براحة بعدها صدقني .. ما توقفش من احلامك احلامك ملهاش نهاية احلامك الي مالانهاية امل سموها احلام ليه .. بس الاحلام مش هتفضل احلام لازم تبقي حقيقة اعمل ع تحقيقها ابدء في تحقيقها وافضل احلم دايما .. الاحلام مهياش بفلوس اصلها ..

- وثق في نفسك وقدراتك ومتحطش نفسك في مقارنة مع حد لانك احسن من اي حد انت احسن انسان في الدنيا متقولش ده احسن مني وده شوف عامل ازاي وانا عامل ازاي وتبدء تيئس من نفسك اوعي تعمل كده .. ربنا سبحانه وتعالي ميز كل واحد فينا بميزة انت عندك ميزة وفيك حاجة انت احسن فيها من اي حد في الدنيا بس انت دور عليها ولاقيها ممكن تكون مميز في الرسم الشعر الكتابة الرياضة الاختراع خفة الدم و و و حاجات كتير جدا انت دور ع ميزتك هتلاقيها وابدء بتحقيق حلمك وفيد الناس بيها .. لان ربك اعطاك الميزة دي عشان تفيد الناس فانت يلا حاول تساعد وتفيد الناس بميزتك ع قد ماتقدر ومتيئسش من نفسك ابدا وخليك دايما مبتسم خليك دايما متفائل ..

- حب نفسك لانك بجد تستحق الحب ده .. حب نفسك واوعي في يوم تكره نفسك او تهمل نفسك .. حب نفسك وحب اخواتك حب اصحابك حب عيلتك حب قرايبك حب الناس خليك دايما مصدر الحب للناس بتحمل الحب للناس كلها .. اوعي تكره حد .. هقولك حاجة الدنيا اساسا مش مستاهلة انك تكره حد او تضايق من حد عيش الدنيا في سعادة وفرحة وتفاؤل وحب للناس كلها ..

- السعادة جواك دور ع السعادة جوه نفسك وطلعها عشان تفرح وتفرح غيرك خليك دايما ماشي بهدف انك تفرح غيرك وتكون سبب في فرحة غيرك .. لانك لما تفَرح غيرك هتحس بفرحة كبيرة اوي ادعي وقول ياارب اجعلني سبب في فرحة حد .. ياارب

- صلاتك .. هتحس بيومك الجميل وهتحس بحياتك انها اجمل لما تحافظ ع صلاتك ودينك صلي صلاتك في وقتها ومتأخرهاش هتلاقي نفسك مرتاح وهتحس باجمل راحة عارف ليه عشان ربنا راضي عنك يااه لما ربك يرضي عنك هتلاقي حياتك جميلة وهتلاقي نفسك فرحان دايما ومبسوط ربنا بيفرحك دايما ..

- انشر التفاؤل والسعادة وانت ماشي .. خلي كلامك مع الناس كله تفاؤل وايجابية بلاش الكلام السلبي المحبط ده .. اوعي تقول كلام محبط لحد .. ممكن كلامك ده يوقفه عن تحقيق حلمه يقلل ثقته في نفسه .. خليك دايما بتوزع تفاؤل ع الناس ..

عاوز تحس بالسعادة ..

هتلقاها في لمة مع صحابك .. بكلمة حلوة من جارك ..
هتلقاها في مجلة ميكي تقراها تفتكر الطفولة وياها .. هتلقاها في طفل متعرفوش بيضحك في وشك .. هتلقاها في كلامك مع اختك .. هتلقاها في شوكولاتة بتاكلها .. هتلقاها في هدية حلوة بتجبها .. هتلقاها في وش ست عجوزة بتضحكلك .. هتلقاها وانت قاعد بتلعب مع بنتك  .. هتلقاها والعيلة ملمومة ع السفرة .. هتلقاها وانت قاعد مع مراتك اللي هي حبيبتك .. هتلقاها في حاجات كتير جنب منك بس انت دور عليها .. هتلقاها جوه نفسك .. السعادة جواك .. J J

جرعة التفاؤل دي امشي بيها دايما .. اعمل كل اللي مكتوب فيها .. هتلاقي حياتك اتغيرت للاحسن هتفيد غيرك وهتفيد بلدك .. هتفيد نفسك .. هتحس بالسعادة اللي بجد ..
ساعد الناس دايما هتحس بمتعة غريبة هي متعة عمل الخير ومساعدة الناس المتعة دي فيها سعادة لاتقد بثمن لما تكون سبب في مساعدة طفل او مساعدة راجل كبير ..

ثق في نفسك وقدراتك ..
ثق في حلمك انت قادر ع تحقيقه ..
ثق في ربك ربك كريم ربك حليم خلي ظنك في سندك جميل ..
خليك متفائل وانشر التفاؤل دايما ..
صلاتك هي حياتك .. حافظ عليها ..
ساعد غيرك .. ساعد الناس ..
ابتسم دايما .. بكرة احلي ان شاء الله ..
بلدك بكرة احسن بيك وبحلمك وهدفك ..

بس كده .. تفائلو يابشر J