الموت .. يأتي فجأة

                           الموت .. يأتي فجأة

اي حد متابع كتاباتي اللي بنزلها في المدونة هيستغرب ايه الموضوع اللي بتكلم فيه الموت !!!!! احنا متعودين في كتاباتك في المدونة بتبقي عبارة عن مواضيع تفائل , سعادة , ابتسامة حاجات بتدي امل في الحياة وتدينا امل لبكرة ..

انا قررت او حبيت اتكلم عن الموت عشان في اقل من اربعين يوم فقدت اتنين من عائلتي غاليين عليا اوووي  جدتي وعمي ربنا يرحمهم يااارب ويدخلهم فسيح جناته يااارب ..

كل واحد فينا كل مايسمع كلمة موت او في حد توفي بيخاف وبيحس برهبة كده لما يروح المقابر وقت الدفن بيحس ساعتها انه ممكن يموت في اي لحظة بس هو مش عامل حسابه دلوقتي مش مستعد للموت مش مستعد انه يقابل ربنا بعد مايطلع من المقابر يقول خلاص انا هواظب ع الصلاة انا هابقي مسلم صح وهاعمل كل حاجة كويسة يدوبه يقعد يومين وبعد كده يرجع زي الاول لو مكانش بيصلي ميصليش لو كانت اخلاقه وحشة يرجع لاخلاقه الوحشة وهكذا هو الحال في كل مره بتسمع سيرة الموت او بتروح المقابر تحضر دفنة حد ميت ..

الموت ده حاجة جميلة اوووي ده يمكن اجمل حاجة بتحصلك الواحد بيقول امتي هقابل ربنا بس الموت حلو والواحد بيتمناه لما بيكون استثمر في الدنيا للاخرة عمل لاخرته زي مابنقول بالعامية .. الدنيا دي مش حاجة اصلا ايه الدنيا دي

كما قال الله تعالي في كتابه العزيز ( كُلُّ نَفْسٍ ذَائِقَةُ الْمَوْتِ وَإِنَّمَا تُوَفَّوْنَ أُجُورَكُمْ يَوْمَ الْقِيَامَةِ فَمَنْ زُحْزِحَ عَنِ النَّارِ وَأُدْخِلَ الْجَنَّةَ فَقَدْ فَازَ وَمَا الْحَيَاةُ الدُّنْيَا إِلَّا مَتَاعُ الْغُرُور ِ ) وكما قال ايضا في كتابه العزيز (اعْلَمُوا أَنَّمَا الْحَياةُ الدُّنْيا لَعِبٌ وَلَهْوٌ وَزِينَةٌ وَتَفاخُرٌ بَيْنَكُمْ وَتَكاثُرٌ فِي الْأَمْوالِ  وَالْأَوْلادِ ) ما الحياة الدنيا الا متاع الغرور يعني مش حاجة مستاهلة اللي احنا بنعمله فيها ده .. كلمة سمعتها وانا واقف في دفنة عمي واحد جنبي واقف قال كلمة اثرت فيا اوي ( بنتاجر في نص متر ) ياااه ايه الدنيا دي حاجة مش مستاهلة كل للي بنعمله فيها ده ما احنا في الاخر هندفن في النص متر ده النص متر ده هو اللي يهمنا هو المفروض نعمل في الدنيا عشانه الدنيا دي مش مستاهلة اللي احنا بنعمله فيها  .. اللي بياكل ميراث اخواته .. اللي بيجيب في سيرة الناس ويغلط في عرضهم .. اللي بيسرق .. اللي بيقتل .. اللي بيشتم ويغلط ويبلطج .. اللي بيحكم بنظام مستبد وقاتل  ويسرق بلده وارضه ..

كلنا هنقابل ربنا مسئلناش نفسنا هنقول لربنا ايه ع الحاجات اللي بنعملها دي هيكون منظرنا يوم القيامة يوم العرض عليه ازاي اكيد مش هنعرف نرد .. الدنيا ربنا بيختبرنا فيها  دار ابتلاء واختبار ليه نعيشها واحنا بنكره بعض وبنتمني الشر لبعض وكل واحد فينا هيموت ويشمت في التاني ..

مانعيش الدنيا ببساطة وبحبنا لبعض وبخوفنا ع بعض وكل واحد فينا بيتمني الخير لي التاني ..                         

( الموت ياتي بغتة ) يعني فجاة مبيفرقش مابين كبير وصغير انت في لحظة ممكن متبقاش موجود معانا دلوقتي ممكن يبقي عندك 100 سنة ولسه عايش وممكن تبقي شاب صغير مكملتش 20 سنة وربنا توفاك .. كل واحد فينا يعمل لما بعد الموت يعمل للاخرة .. سيرتك بعد ماتموت الناس هتقول ايه ده كان ابن تيييت وابن .... وابن .... وكان بيعمل حاجات وحشة كتير واخلاقه وحشة ومكانش محترم في تعامله مع الناس .. ولا هيقولو ده كان محترم وكان طيب وكانت كل الناس بتحبو من اخلاقه الطيبة وتعامله الحسن  الكويس مع الناس ..                               

اهم حاجة سيرتنا اللي ناس هتذكرنا بيها بعد الموت  ما الدنيا الا متاع زائل والاخرة هي دار البقاء اي دار الحياة الدائمة كلنا بنبص لدنيتنا بس قليل لما نلاقي حد بيبص للاخرة ونعيمها .. طب مااحنا ممكن نعيش الدنيا دي باحلي مافيها ومع ذلك نكون بنعمل للاخرة ..                         

الشئ اللي باقي لينا كلنا هي اخلاقنا اللي عيشنا بيها وتعاملنا بيها مع الناس بالمعني الصح الشئ اللي باقي ليك هي سيرتك واعمالك الكويسة اللي عملتها واعمال الخير اللي انت عملتها هو ده اللي باقي ليك .. خلي سيرتك جميلة الناس تذكرك بالكلام الجميل الطيب .. واستثمر الدنيا للاخرة عشان تفوز برضا ربنا عليك وخليك مسلم صح تعامل باخلاق الاسلام وتعامل بمبادئ الاسلام عشان تفوز بالاخرة ونعيمها وتفوز ( بما لا عين رأت ولا اذن سمعت ولا خطر علي قلب بشر ) ..

ربك كريم ربك رحيم خلي ظنك في سندك جميل ..

ثورة الاخلاق ( ثورة علي النفس )

                    ثورة الاخلاق ( ثورة علي النفس )

كنت بسئل نفسي ( هل الثورة طلعت اسوأ مافي الشعب المصري طلعت اخلاقنا السيئة وطباعنا السيئة ؟ ) فقولت قبل ماارد علي نفسي اشوف الحاجات اللي بنعملها بعد الثورة والحاجات اللي ظهرت بعد الثورة واشوف الاجابة هتكون ايه علي السؤال ده ..

اولاً : طريقة تعاملنا مع بعض :

دلوقتي تعاملنا مع بعض بقي صعب جدا وبقي وحش اووي محدش طايق غيره ومحدش بيستحمل التاني وكلامنا كله بقي مليان شتايم والفاظ سيئة ..

*طريقة تعامل الصحاب مع بعضهم بقي كله شتايم علي سبيل الهزار بقت كل كلمة لازم يكون اخرها شتيمة بقي كل واحد بيسمح ان صاحبه يشتمه بالاب والام وهو فرحان ويكون بيضحك ومش قادر يمسك نفسه من كتر الضحك وهو يرد عليه بشتيمة لابوه وامه وهو يكون فرحان وبيضحك اصبحت الشتايم شئ طبيعي وعادي بين الصحاب وكلامهم مع بعض..

احنا محتاجين ثورة اخلاق في تعاملنا مع بعض ثورة علي نفسنا عشان نبطل الشتايم والالفاظ السيئة اللي احنا بنقولها ثورة علي لسان كل واحد فين انت عارف انك بتتحاسب علي كل كلمة بتطلع من بؤك فراعي ربنا في اي كلمة بتتطلع من بؤك وخلي كلامك اللي بيطلع تاخد عليه ثواب تنصح واحد صاحبك تمنع واحد من فعل شئ سيئ خلي كلامك حلو حَسِنٌ من لسانك .. 

*طريقة تعامل الشباب والاولاد مع الرجالة الكبار  اصبح مفيش احترام لراجل كبير ماشي او حتي بيتكلم واواقات كتير يغلطو فيه ويشتمو فيه بدون عدم احترام لسنه الكبيير ونسيو قول الرسول صلي الله علي وسلم ( ليس منا من لم يرحم صغيرنا ويوقر كبيرنا ) يوقر كبيرنا اي يحترمه ويقدره وده اصبح شئ عادي انك تمشي في الشارع تلاقي راجل كبير بيتخانق معا واحد صغير وكمان بيغلط فيه اصبح مشهد طبيعي بتشوفه في مصر دلوقتي للاسف ..

احنا محتاجين ثورة اخلاق في تعاملنا مع الناس الكبيرة لازم نعرف ان عقلنا غير عقلهم لازم نستحملهم ونقدرهم ونراعيهم ونسمع كلامهم من غير مانعلق عليه او نعلق عليه باسلوب محترم  لانه اي حد كبير عارف اكتر منك وعنده خبرة في الحياة اكتر منك مش نتخانق معاه ومنحترموش خلي  تعاملك مع الناس كبيرة جميل ده حتي كفاية دعواتهم ليك ياعم انت J J

*طريقة تعاملنا لو واحد مختلف معايا في الرأي بقي دلوقتي المبدأ اللي مشيين بيه لاقنعك برأيي لاشتمك وساعات كمان بتوصل انه ممكن يكفرك كل واحد ليه رأيي مختلف عن التاني لازم احترم رأيه واقوله رأيي ووجهة نظري باحترام مش اغلط فيه واشتمه واتعامل معاه ع انه مبيفهمش وانه رايه ده تافه او مالوش لازمة تشوف اتنين مثلا بيتكلمو في السياسة تلاقي الاتين يبدأو كلامهم عادي لغاية لما واحد ميعجبوش رأي التاني او شايف انه غلط بتلاقي الاتنين قامو ع بعض ولا اكنها حرب وده يشتم وده يغلط وبتوصل للسباب واللعان ومنهم من يعلم قول الرسول صلي الله عليه وسلم ( إن من الكبائر أن يلعن الرجل والديه، قيل يا رسول الله: وكيف يلعن الرجل والديه؟ قال: يسب الرجل أبا الرجل، فيسب أباه، ويسب أمه ) ومع ذلك يسب ويلعن  وكل ده عشان اختلافنا في وجهات النظر  بلاش السياسة بتشوف اتنين بيتكلمو مثلا في الكورة يبدا الكلام عادي لغاية لما يجيب سيرة اللعيب اللي بيحبه او الفريق اللي بيشجعه تلاقي الاتنين بدأو يغلطو في بعض ومحدش محترم رأي التاني وتلاقي الواحد منهم بيدافع عن اللعيب ده لو حد غلط فيه يمكن اكتر من ابوه كمان بقي مفيش روح رياضية دلوقتي مابينا جمهور ده يغلط في ده واصبحت الجماهير بدأت تقلد البلطجية وعاوزين يقولو للناس  انه محدش يقدر عليهم بالمعني البلدي ..

احنا محتاجين ثورة الاخلاق في طريقة اختلافنا في الرأي واختلافنا في وجهات النظر ثورة علي نفسنا ومننساش المقولة المشهورة ( الاختلاف في الرأي لا يفسد للود قضية ) عاوزين نحترم رأي بعض واختلافاتنا في وجهات النظر تكون بناءة مش هدامة عشان نرقي بالوطن ونعلي بيه ونتقدم بالوطن ونكون شعب متحضر ..

ثانياً : طريقة الاعلام واخلاقه :

اصبح الاعلام في وقتنا الحالي دلوقتي يعني بقي وسيلة لتري وتسمع ابشع الالفاظ والكلام الغير صحيح والاشاعات و الكلام في عرض الناس و و و و تفتح قناة دينية تسمع الفاظ وكلمات ولا اكنك فاتح قناة التت يمكن ولا اكنك وسط شوية بلطجية شمامين وحشاشين قناة دينية بتكون انيل من قناة عادية الشتايم والالفاظ السيئة اصبحت شئ عادي علي القنوات دلوقتي اصبحت شئ عادي في حياتنا تفتح التلفزيون دلوقتي تلاقي لفظ بيتقال انت بتتكسف تقوله اصلا وتسمعه مامتك واختك والبنات المحترمين اللي ماكانوش يعرفو الشتايم دي اصبحو بيسمعوها عادي ولا اكن في حاجة بتتقال واصبح في الفاظ سيئة بقي اي حد ممكن يقولها سواء ولد او بنت محترمة او حتي ....  

كل برامج التوك شو اللي بتقعد تتكلم في اعراض الناس وتقعد تتكلم اصبحت برامج غيبة ونميمة وليست برامج توك شو ..

لا اتحدث عن كل الاعلام ولكن اتحدث عن بعض القنوات القليلة اللي بتسؤ سمعة  الاعلام المصري وسمعة المصريين

بعد الثورة بقينا بنسمع الفاظ كنا لا يمكن نسمعها قبل الثورة ..

احنا محتاجين ثورة الاخلاق في اعلامنا حتي يصبح اعلام محترم ومتحضر واعلام هادف اعلام يفيد الناس ..

ثالثاً : اخلاقنا علي اليوتيوب :

يوتيوب الموقع الشهير اصبح مكان للسباب واللعان والشتائم والالفاظ السيئة افتح اي فيديو علي اليوتيوب مثلا اغنية وشوف التعليقات تلاقي واحد دخل شتم المغني ولا المغنية اللي بتغني تلاقي كله يخش يغلط فيه ولم تصبح التعليقات مكان للاعجاب بالاغنية او مكان للنقد البناء لمن يغني دي اصبحت مكان للخناق مكان للسباب واللعان بتوصل لواحد بيسب الدين ويكفر عشان خاطر تعليق واحد علي الاغنية اللي بيحبها وبتوصل لسباب البلدان الشباب العربي يشتم بعضه في التعليقات وهو ده حال العرب  تفتح فيديو مثلا كورة وشوف التعليقات تلاقي واحد مبيحبش اللعيب وغلط فيه الدنيا تقوم ومتعدش علي التعليق ده تلاقي كل داخل يشتم فيه لغاية مايوصلو لسب الدين مش عاوز اتكلم عن الفيديوهات السياسية وتعليقاتها لانها بتبقي مش تعليقات لا ماسورة قذارة ووساخة وفتحت بنشوف تعليقات انت تتكسف ان اختك تشوفها ولا بنت محترمة حتي تشوفها كلام يخدش حياء البنات وهذا هو حال المصريين والعرب علي اليوتيوب ..

احنا محتاجين ثورة الاخلاق علي اليوتيوب عاوزين نستخدم اليوتيوب استخدام صحيح ونراعي التعليق اللي هنكتبه ولازم تعرف ان التعليق بتاعك ده ممكن تشوفه اختك او تشوفه بنت محترمة فراعي كلامك اللي بتكتبه وخليك عارف انك بتتحاسب علي كل كلمة بتقولها وكل كلمة بتتطلع من فمك فراعي كلامك ..

رابعاً : طريقة تعاملنا علي الفيس بوك :

تعاملنا علي الفيس بوك اصبح مش موقع تواصل اجتماعي لآ موقع شتايم اجتماعي موقع غيبة ونميمة اجتماعي شوف اي بوست ع الفيس بيتكلم عن اي حاجة سياسة , كورة , فن , وشوف التعليقات شتايم والفاظ مش هعيد الكلام اللي قولته فوق عن اليوتيوب لانه يعتبر هو هو ولكن الفيس يتميز عن اليوتيوب اليوتيوب شتايم والفاظ سيئة بس لكن الفيس يتميز بالشتايم والالفاظ وكمان الغيبة والنميمة ونشر الفضايح والاشاعات تلاقي واحد عامل شير لصورة او لبوست كلام او خبر او اشاعة كلام مش موثوق منه وواحد تاني يصدقه وده ينقل لده ويستمر الحال بس انت تعرف انك كده بتتحاسب علي الكلام الغلط اللي بتنشره والسمعة السيئة اللي بتصف بيها الناس الفيس اصبح مصدر للاشاعات والاخبار الغير موثوق بيها ..

احنا محتاجين ثورة الاخلاق علي الفيس بوك عاوزين نستخدم الفيس في الاشياء المفيدة الفيس مش كله اشاعات واخبار غير موثوق بيها لآ احنا ممكن نتعلم من ع الفيس ننشر معلومات مفيدة ننشر كلام ديني حديث عن الرسول عليه افضل الصلاة والسلام اللي بيقرا الكلام ده هيقول انت ياللي كاتب الكلام ده مش عندك اكونت علي الفيس وبتقعد عليه كتيير اه انا عندي اكونت علي الفيس وبقعد اهزر كتيير عليه لكن مستخدمه صح لما بنشر حاجة بنشر حاجة مفيدة حاجة يستفاد بيها غيري يستفاد بيها اللي بيقراها الفيس ده مكان للرفاهية ومكان للحصول علي المعلومات المفيدة ومكان للحصول علي المعلومات الدينية الفيس بوك حاجة مفيدة لينا بس نستخدمه صح ..

خامساً : التحرش :

دلوقتي في ايامنا دي وبعد الثورة ارتفعت نسبة التحرش بطريقة كبييرة جدا كل يوم نسمع عن ضحية تحرش جديدة ايه اللي حصل لينا ياشباب ماحدش يقولي المشكلة في اللبس بالعكس مش في اللبس او المشكلة في البنت لا مش في البنت طب ما زمان ايام الستينات والسبعينات كان البنات بتلبس لبس معلش في اللفظ لبس انيل من دلوقتي ولكن  كان محدش يقدر يتحرش بيها لان كان في اخلاق زمان المشكلة دلوقتي في اخلاقنا احنا اللي مسدئنا ان الامن مش زي الاول واصبحنا مش هممنا حد نتحرش باي حد كبيرة صغيرة سواء لابسة لبس محترم او حتي لبس .....

احنا محتاجين ثورة اخلاق وثورة علي انفسنا عشان نتحكم في نفسنا ونراعي اخوتنا البنات  اللي في الشارع لو كل واحد شاف البنت اللي في الشارع واعتبرها اخته مش هيقدر يلمسها ولا حتي يعاكسها راعي ربنا في اي بنت بتشوفها عشان ربنا يراعي بناتك واعلم انه ( كما تدين تدان ) ..

سادساً : الفن :

*الغناء :

بعد الثورة ظهرت المهرجانات الشعبي واوكا واورتيجا و و و

مكناش بنسمع عنها قبل الثورة يمكن كانت موجودة اه لكن قليل وكمان مكناش بنسمع عنها دلوقتي تلاقي اي كلام يقولك مهرجان شعبي اوكا و اورتيجا تسمع الاغنية ده لو اعتبرناها اغنية متفهمش حاجة نص كلام المهرجانات دي شتايم والنص التاني تحية يقولك وتحية لدار السلام تحية لمين وتحية لمين وكده عملت اغنية وعملت مهرجان شعبي تلاقي اطفال بيسمعو الغنا ده وبيحبوه واتعلقو بالاغاني دي وشباب كبير حتي البنات بقو بيسمعو شعبي بس ده كمان مش غناء شعبي ولا حتي فن شعبي دي حاجة ملهاش معني اصبحت فن وغناء

وتلاقي ناس كتيير طلعت تغني شعبي اهو اي كلام وخلاص وابقي مغني يعني مصر بلد الغناء وبلد عبدالحليم وام كلثوم وعبدالوهاب و و و كل المغنين العظماء دول يبقي ده حال الغناء فيها دلوقتي المهرجانات دي اخدت شعبية كبييرة جدا واتنسبت للفن المصري ..

* التمثيل :

افلام مابعد الثورة اصبح دلوقتي منتج افلام واحد بس بيتحكم في الافلام المصرية كل مايهمه هو الفلوس اللي بيكسبها من وراء الفيلم سواء كان فيلم هادف او حتي فيلم ليه قصة اغلب الافلام بقت بتتكلم عن البلطجية مش عارف ايه الالماني وعبده موتة و و و افلام كلها بقت رقص ومهرجانات شعبي وحبة بلطجة هو ده مفهوم انتاج فيلم بعد الثورة تجيب حبة رقصات وممثل يعمل بلطجي وحبة خناقات في الفيلم وكام مهرجان شعبي من اللي طلعو اليومين دول وكده تعمل فيلم يحقق اعلي ايرادات في السينما المصرية مثل فيلم عبده موتة اللي في اول اسبوع له حقق ايرادات لم يحققها فيلم مصري حتي الان لما عرفت كده عرفت ان العيب مش في الممثل او المنتج اللي عامل الفيلم لا العيب فينا احنا احنا اللي عايزين الافلام دي بس مش معقولة مصر رائدت السينما العربية بلد يوسف وهبي وامينة رزق و زكي رستم و و و كل الممثلين العظماءيبقي ده حال فنها دلوقتي ..

احنا محتاجين ثورة اخلاق علي الفن دلوقتي ثورة اخلاق علي نفسنا عشان نبطل نتفرج علي الافلام المسفة اللي ملهاش معني دي والاغاني الشعبي او مايسمي بالمهرجانات اللي مالهاش معني دي احنا طول مابنتفرج علي الافلام دي ونسمع الاغاني دي طول ماهي هتستمر وتزيد وتبقي موجودة اكتر من الاول عاوزين يبقي عندنا فن هادف وغناء هادف تمثيل محترم تمثيل يبين لنا اشياء مفيدة افلام تتحدث عن قصص ادبية جميلة افلام تتحدث عن قصة موضوعية عاوزين فن محترم وهادف ..

بعد كل اللي قولته الحاجات اللي بتحصل بعد الثورة اللي بيعمل الحاجات اللي قولتها دي نسبة ضئيلة جدا من الشعب المصري ولكن الحاجات دي بتتنسب للشعب المصري كله والعالم بيقول دي اخلاق الشعب المصري لا اتحدث عن الشعب المصري كله في ذلك وبعد الحاجات اللي كلمت فيها  قولت ارد علي السؤال اللي سألته لنفسي في الاول اللي انت اكيد نسيته وهو (هل الثورة طلعت اسوأ مافي الشعب المصري طلعت اخلاقنا السيئة وطباعنا السيئة ؟ ) بعد كل ده لقيته الاجابة لآ الثورة مش طلعت اسوأ مافينا ..

مما لاشك فيه ان الشعب المصري قام بثورة يناير العظيمة الثورة التي تحدث عنها الكثير بانها من اعظم الثورات ع مجري التاريخ بس المشكلة فينا احنا فهمنا الحرية غلط يمكن ولا متعودناش علي الحرية بالطريقة دي عشان كده خرج مننا كل الحاجات دي

وكما قال الامام الشافعي رحمه الله

نعيب زمـانـنا والــعــيب فــينـا ,,,,,,,,, ومــا لـزمانـنا عيــب ســــــوانا

ونـــهـجـو ذا الـزمان بغير ذنـب ,,,,,,,,, ولــــو نــطق الــزمان لنا

هجانا

وليس الذئب يأكل لحم ذئب ,,,,,,,,,,,, ويــأكل بـعــضنا بـعـضا عـــيانا

نعم صدق الامام الشافعي في قوله ليس العيب في الزمن اللي احنا فيه ولكن العيب فينا احنا احنا زي ماقمنا باعظم ثورة وشيلنا نظام فاسد ومستبد محتاجين ثورة اخلاق ثورة علي نفسنا لو عاملنا ثورة علي انفسنا واتحكمنا في اخلاقنا وتعاملنا والحاجات اللي بنعملها مصر هتتقدم بينا باذن الله هنتقدم باخلاقنا الطيبة لان الشعب المصري افضل شعوب الارض باخلاقه وطيبته وهيتقدم باذن الله وهنقوم من المحنة اللي احنا فيها دلوقتي باخلاقنا سنرتقي ..

                        باخلاقنا سنرتقي 

رحمة الله ( ورحمتي وسعت كل شئ)

رحمة الله ( ورحمتي وسعت كل شئ)

كما قال سبحانه وتعالي في كتابه العزيز ( ورحمتي وسعت كل شئ ) رحمة ربنا كبييرة اوي ربك رحيم بينا شوف انت بتعصي ربنا اد ايه وبتغلط كتييير ومش مهتم بفروضك وربنا رحيم بيك ورحمته وسعت كل شئ ربنا مش محتاج منك حاجة عشان تعصيه ومتهتمش بفروضك بالعكس انت الللي محتاج ربنا في كل حاجة شوف انت بتعصيه وبعد كده تقول يارب ربنا بيغفرلك ويرحمك
 ربك كريم ربك رحيم خلي ظنك في سندك جميل ..

لما بتبقي مخنوق او مضايق او في مشكلة بتروح تشكي للناس وبتروح تقول لده وده مع ان محدش منهم هيفيدك غير ربك مفيش اجمل من انك تشكي اللي جوااك لربنا وتتطلع اللي جوااك لربنا وتقول يااارب وكما قال تعالي في كتابه العزيز ( ورحمة ربك خير مما يجمعون ) ربنا حاسس بيك انت مش مطلوب منك بس غير انك ترفع ايدك في السما وتقول يااارب  ربنا هو اللي هيفك كربتك وضيقتك واوعي تيأسو من رحمة ربنا ربنا رحمته وسعت كل شئ  كما قال تعالي في كتابه العزيز ( ولا تياسو من روح الله انه لا ييأس من روح الله الا القوم الكافرون ) اوعي تقول مفيش امل او مفيش فايدة لا في امل ربنا رحمته كبييرة ..

نِعم ربنا علينا كتييرة جدا نِعم لا تحصي ولا تعد كما قال الله تعالي في كتابه العزيز ( وان تعدو نعمة الله لا تحصوها ) كل واحد فينا مش حاسس بيها او مش مقدر نعمة ربنا عليه كل حاجة نعمة من ربنا الحياة دي اصلا نعمة من ربنا متقدرش تستغني عن اي حاجة من نعم ربنا عليك ومع ذلك انت مش مقدر نعم ربنا عليك وبتعصيه ومع ذلك ربنا يرحمك لان رحمة ربنا كبييرة  ورحيم علي عباده ..

لما تعرف ان الرحمن الرحيم ذكرت في القران كريم 170 مرة وكلمة جبار ذكرت مره واحدة هتعرف قد ايه رحمة ربنا كبييرة ورحمته وسعت كل شئ ربنا رحيم بينا ..

       وزي ماقال حمزة نمرة (فوق م اللي انت فيه ربك دايما جنبك لو ناديته هتلاقيه جايز ده اختبار ركز في الاجابة وقول ياارب وخد قرار) ربنا دايما جنبك وموجود معاك هو محتاج يسمع صوتك وانت بتدعيله وتشكيله عن اللي جوااك وترفع ايدك للسما وتقول يااارب انت عالم بحالي انت ماعليك شئ غير انك تقول ياارب وكل ضيقة انت فيها او مشكلة هتتحل باذن الله .. قول يااارب ..

Smile يَ مبوز

   Smile                      يَ مبوز     

انت ليه متضايف ومهموم وشايل حمل الدنيا كلها فوق دماغك وماشي مكشر علطول طب قولي هتستفاد ايه من التكشييرة دي ولا اي حاجة غير ان التكشييرة دي هتضايقك اكتر وتشيلك هموم فوق همومك انت لما بتمشي مبتسم هتخسر حاجة بالعكس ده انت بتعمل خيير لما بتمشي مبتسم ولما تشوف حد بتبسم في وجه ده الرسول صلي الله عليه وسلم قال (تبسمك في وجه اخيك صدقة ) يعني انت كمان بتاخد حسنات لما بتبتسم طب جرب تبتسم وتضحك كده والله ماهتحس بضيق ولا هتحس انك مهوم ولو عندك مشاكل هتلاقيها بتتحل بالابتسامة  باذن الله بس لما تخلي ثقتك في ربنا كبييرة .. خليك مبتسم علطول J

ليه بتفكر في الناس كتيير وبتبقي عامل حسابهم دايما وبتبقي هتموت ويرضو عليك وتعمل الحاجات اللي بترضيهم ماحدش من الناس دي هتفيدك في حاجة ولا هتنفعك عشان تتعب نفسك في التفكيير فيهم المهم رضا ربنا عليك ربنا لما هيرضي عليك هتلاقي حياتك اتغيرت للاحسن وبقت حلوة وسعييدة وهتلاقي الخيير بيجيلك باذن ربنا .. اعمل الحاجات اللي تخلي بنا يرضي عنك علطول ومتعصاش ربنا علشان خاطر الناس اهتم بدينك وفروضك اللي عليك ومتخليش حاجة تعصيك عن ربنا وكتر دايما من الخيير خلي رضي ربنا عنك هو هدفك ف الحياة لتنال الاخرة ونعيمها باذن الله ..

حدد حلمك وهدفك وحدد الخطوات اللي هتوصلك لحلمك وامشي عليها واوعي تقول عمري ماهحققه وعمري حلمي ماهيكون خلي  ثقتك في نفسك كبييرة وثقتك في ربك كبييرة ربك بيده كل شئ هيكون هو القادر انه يحقق حلمك كل الناجحيين والعظماء كانو زيك كده وفشلو اكتر من مره ولكن ثقتهم في نفسهم وثقتهم انهم قادرين انهم يحققو حلمهم ويوصلو لييه حققو حلمهم وهدفهم واصبحو ناجحيين واعرف انك عشان توصل لحلمك هتفشل كتيير وخليك متفائل من اي حاجة بتحصلك وفي مقولة اقريتها بحبها اوي وبحب اقولها كتيير ( من التفاؤل يولد الامل .. ومن الامل يولد العمل .. ومن العمل يولد النجاح ) المقولة دي لو فهمتها ومشيت بيها هتحس انك قريب من حلمك وثق في ربك لانه بيده كل شئ يكون وباذن ربنا توصل لحلمك وهدفك ..

هاتضايق نفسك علي ايه
وهاتحمل فوق طاقتك ليه

دي الدنيا والله ماتستاهل تحمل حزن وهمها ليه

ليه مكشر دايما مهموم

من الدنيا وحالها وما فيه

دي الدنيا والله ماتستاهل التكشيرة اللي في وشك دي

عمال بتفكر في الناس

ومحدش كده سائل فيك

ده محدش منهم هيفيدك فبلاش تفكر فيه

طب جرب تضحك من قلبك

طب جرب تضحك علطول

وتنفض للدنيا وحالها وكل مافيه

حدد حلمك حدد هدفك

واوعي تقول عمره ماهيكون 

ده ربك بيده كل شي يكون

ربك كريم ربك حليم خلي ظنك في سندك جميل

مشكلة .. المزاكرة

                    مشكلة .. المزاكرة

اوم زاكر يبني .. حاضر ياماما .. اوم زاكر يبني .. اوم زاكر يبني .. حاضر ياماما وفي الاخر بينتهي الموضوع لا بتتشتم لا بتتضرب لابوك بيهزأك لا امك بتدعي عليك وتقول ربنا ياخدك ان شاالله عنك مازاكرت بعد المعاناة دي بتئوم تزاكر فاتح الكتاب وقاعد ادامه ماسك قلم عمال بتشخبط وحبة ترسم وعمال تحط خط تحت كل كلمة علي اساس انك كده بتزاكر بنضحك ع نفسنا ان احنا كده بنزاكر طب سئلت نفسك انا بستفاد ايه طالما انا قاعد قدام الكتاب طب مازاكر بجد بدل ما اعمل نفسي اني بزاكر وامثل اغلبنا مش بيحب المزاكرة اغلبنا!!!! ايه كلنا مبنحبش المزاكرة وبنزاكر غصب عننا وبنزاكر كده بس عشان ننجح يعني اللي ينجحنا وبس يعني يبقي اسمي طالب عادي (ناجح)  ليه مااكونش طالب متفوق .. هو الطالب المتفوق ده زايد ايه عنك يعني زايد ايد زايد رجل زايد مخ ابويا كان يقولي الكلام ده وانا في ابتدائي لما كان بيلاقيني طالب عادي (ناجح) وبيلاقي صحابي معايا متفوقين وبيطلعو الاوائل انا كنت بقول اه دول زايدين عني ايد ورجل ومخ دول ناس مش زي ولا انا هعرف اكون زيهم كنت طفل ابتدائي بقي وانا اقنع نفسي ان المتفوقين دول ناس مش زيينا يعني اكيد زايدين حاجة عني خلصت ابتدائي وانا طالب عادي دخلت اعدادي ابويا يقولي نفس الكلام وانا برده لسه بفكر نفس التفكيير ان المتفوقين دول ناس مش زي هي مادة واحدة كنت متفوق فيها في اولي اعدادي كنت بقفلها يعني كنت زي الطلاب المتفوقين كنت بتساو معاهم يعني هما مش زايدين عني حاجة بقي امل ايه التفكيير اللي كنت بفكره ده شوف هي مادة واحدة تفوقت فيها ودوئت طعم النجاح والتفوق ابتديت اتفوق في كل المواد وابتديت احاول اني اكون من المتفوقين والحمدلله بحاول اكون دايما من المتفوقين انت لو دوئت طعم التفوق مرة حسيت انك بقيت في مرة طالب متفوق مش طالب عادي (ناجح) عمرك ماهترجع تاني تكون طالب عادي هتحاول انك تبقي علطول طالب متفوق  عاوزيين نغير فكرتنا عن النجاح .. النجاح عندنا مفهوم اني اعدي السنة ع خير من غير مااشيل حاجة ليه ميبقاش مفهوم النجاح ان اتفوق واحاول اطلع من الاوائل او اجيب مجموع حلو 

الكلام ده قريتو عجبني اووي :
طول ما انت بتذاكر علشان تدخل طب أو هندسة ..
هتلاقي نفسك بتزهق من المذاكرة مرة , او بتصاب باليأس والاحباط مرة تانية .. مع ان اليأس زي الأفعي , لو مسكنا من جوانا ^ عمر ماحاجة هتبقي نافعة ! :(

أصدقائى .. احنا ليه ما بنذاكرش علشان نرضي ربنا ؟ 
- نرضي ربنا ! .. اه نرضي ربنا :))
زاكر علشان تاخد حسنات! زاكر علشان " خيركم من تعلم العلم وعلمه " :) زاكر وانت مقتنع بان المذاكرة عبادة! 
طب جرب كدة! مش هتخسر حاجة.. وابقي تعالي قولي ايه النتيجة :)
وخليك متأكد , انك علشان تنجح, لازم رغبتك في النجاح تتخطي خوفك من الفشل! :) J

بجد فعلا ليه منزاكرش عشان نرضي ربنا نزاكر واحنا مقتنعين ان المزاكرة عبادة ودي حاجة هترضي ربنا

نفسي كلنا نغيير مفهوم النجاح عندنا ونخليه اني اكون متفوق وناجح لو كلنا فكرنا بالمفهوم ده مصر بكرة هتتغير صدئني هنتقدم لقدام لو كلنا حاولنا نبقي متفوقين ونحط هدف قدامنا وحلم عايشين لييه عشان نحققه وعشان نفيد بلدنا مصر هتتغير بينا بجد
 

وربنا يوفقنا كلنا في الامتحانات J

فينا خير ( امة الخير )

فينا خير ( امة الخير )

كل واحد فينا جواه خير جواه انسان طيب انسان طموح انسان ناجح كلنا بنعمل خير واحنا مش حاسيين باللي بنعمله ايوة احنا امة الخير وفي قوله تعالي ( كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ وَتُؤْمِنُونَ بِاللّهِ ) احنا خير امة باعمالنا وبكلامنا وباخلاقنا وافعالنا وبصفاتنا وبكل حاجة بنعملها لازم نثبت ان احنا خير امة كما قال سبحانه وتعالي ..

كلنا بنعمل خيير ومش حاسيين بيه انا مقتنع ان كل واحد فينا جوااه خير مهما كان هو ايه او اخلاقه ايه وده طبيعي فينا لاننا بنعمل حاجات خير كتيير واحنا مش حاسيين بيها اه بكررها تاني مش حاسيين بيها اديك مثال لما تشوف ست كبييرة وقفة عاوزة تعدي الشارع وتروح تمسك ايديها واتعديها الشارع من غير ماتطلب منك حتي ده خيير لما تشوف اتنين بيتخانقو في الشارع وتروح تحجز مابينهم وتحاول تصلح مابينهم ده خيير لما تلاقي صاحبك معاه منديل ورماه علي الارض وتقول يبني ( النظافة من الايمان ) ده خيير لما تشوف عربية وقفة بايزة وتروح تساعد صاحبها وتزق معاه العربية ومتسيبوش غير لما  العربية تمشي ده خيير لما الاذان يأذن وتقول لصحابك يلا نصلي ده امر بالمعروف وخيير لما تشوف صاحبك عمال يعاكس بنات وتقوله يبني انت هتستفاد ايه من المعاكسة وتقوله حرام عليك ده نهي عن منكر وخييير لما تشوف صاحبك بيشتم وتقوله يبني حرام عليك ده  نهي عن منكر وخيير لما تشوف بنت بتتعاكس وتروح تقول للي بيعاكسوها هي دي الرجولة ده خيير  لما تشوف جارتك راجعة من السوق وتشوفها وهي شايلة شنط كتيير وتروح تساعدها وتشيل منها الشنط ده خييير وحاجات كتيير بنعملها خييير واحنا مش حاسيين بيها عاوزين كلنا نعمل خيير ونمشي بقوله سبحانه وتعالي( كنتم خير امة اخرجت للناس ) ..

هاديك امثلة  بسيطة تعملها في الخيير غير الحاجات الخيير الي انت بتعملها وانت مش حاسس بيها

مقتطفات في الخيير ( فكرة وصدقة ) :

1- اشتري كام كرسي وضعها في المسجد لتأخذ اجر من صلي عليها .

2- ضع في غرفتك صندوق وكلما اذنبت ضع فيه مبلغا وتصدق به نهاية كل شهر .

3- اطبع دعاء دخول البيت والخروج منه علي ورقتين وضعها في مدخل العمارة تكسب اجر كل من يدخل ويخرج من بيته .

4- انزل انت وصحابك في منطقتك واعمله حملة تنظيف للمنطقة اللي انت فيها كل شهر .

5- جمع لبسك القديم ولبسك الي انت مش عاوزه وروح تبرع بيه لاي جمعية خيرية او اي حد محتاج .

6- اعمل انت وصحابك في مدرستك حملة تنظيف لمدرستك .

7- شوف اي ست او راجل كبيير عندك في منطقتك عايش لوحده وملوش حد يسئل عليه وروح اقعد معاه كل شوية وخليه يحس ان في حد بيسئل عليه .

دي حاجات بسيطة خييير ممكن تعملها ومش صعبة حاول دايما تعمل خيير ومتسئلش ايه الاستفادة من الخيير ده الخيير ده ثوابه كبيير عند ربنا واقول لصحابك وانصحهم انهم يعملو خيير لو كلنا عملنا خيير الخير هيعود علينا وخليك فاكر ان ثوابك عند ربنا ومتنساش ان احنا امة الخيير J

( الشعب المصري ) احسن شعوب الارض

          ( الشعب المصري ) احسن شعوب الارض

احسن شعوب الارض في كل حاجة بنعملها في اخلاقنا وطيبتنا وكرمنا وشهامتنا هي دي مصر الكلمة اللي قولتها لما حصل معايا الموقف ده طالع انا وصحابي من درس الصبح  وكنا عايزين  نفطر اصل مفيش  احسن من الاكل مع لمة الصحاب فكل واحد فينا راح يجيب حاجة اللي راح يجيب عيش واللي راح يجيب فول وطعمية جبنا الفول والطعمية وروحنا استنينا بقيت صحابنا قدام فرن العيش وعمالين نهزر ونضحك عدت من قدامنا ست واحنا بنقول العيال دي مش عاوزة تخلص احنا جعانين سمعت الست الكلمة دي وراحت وقفت قدامنا وجابت خمس ارغفة وقالتلي خد يبني انت وصحابك وتحلف بالله وتقول والله لتاخده الست عادية جدا والابتسامة علي وشها وبنتها الصغيرة في ايديها واحنا شكرا ياحجة صحابنا بيجيبو عيش والله شكرا تسلمي ياحجة وهي مصرة وتحلف بالله انا قولت ساعتها هي دي مصر هو ده  الشعب المصري المعروف بالكرم والشهامة والجدعنة الشعب المصري الشعب العربي الوحيد اللي  بيخاف علي غيره مش بيهم نفسه بس واللي بيساعد جيرانه واهله ولما بيجيله ضيوف وهو مش عنده حاجة يقدمهالو وعلي قده الضيف مبيطلعش من بيته الا وهو علي اخره من كتر الكرم في حاجات كتييير بنعملها ومتعودين عليها الحاجات دي مبنشوفهاش غير في مصر بس  ومش عارفين قيمة الحاجة دي مع انها حاجات جميلة جدا زي لما بنشوف ست كبييرة وقفة عاوزة تعدي الشارع بنروح نساعدها ونعديها من غير متتطلب مننا وزي عربية وقفة عطلانة بنروح نساعد صاحب العربية ونقف معاه ومنسيبوش غير لما العربية تتصلح وتمشي من غير ميطلب مننا الشعب المصري الوحيد اللي مبيهموش نفسه بس ولا بيقول نفسي نفسي لا بيهمه يساعد غيره حتي لو ميعرفوش وهي دي شهامة وجدعنة المصريين اللي مخاليانا احسن شعوب الارض ....

الشعب المصري معروف بدمه الخفيف وسخريته الدائمة وهو ده اللي مصبره علي اللي بيحصل في البلد اي حاجة بتحصل معاه بيحولها لنكته ويسخر منها عشان يعديها وتمشي الحياة وزي مابيقولو الشعب المصري دمه خفيف وكثيير الضحك والهزار ودي اجمل حاجة فينا اننا مبنحبش النكد وببحب نضحك علطول سخريتنا من الحاجات الللي بتحصل معانا والحاجات اللي يتحصل في البلد هي اللي بتخلينا نعيش ونستمر ونكمل الحياة برغم اللي بيحصل معانا ونعديها وننسه عشان نعيش

روح اقعد مع ناس كبييرة وشوفهم وهما بيتكلمو ويهزرو ويضحكو من قلبهم ويضحكوك معاهم هتقول هي دي مصر مصر الجميلة مصر الحلوة وشعبها احسن شعوب الارض

يااطيب شعب علي الارض .. ياشعب الخير

ياشعب الضحكة علي وشه مبتفرقوش .. ياشعب وشه بشوش

ياشعب معروف بالكرم والشهامة   .. ياشعب اصيل

يااطيب شعب علي الارض .. ياشعب الخير